ભુલકાઓનો પ્રવાસ:કચ્છના નાના રણમાં મીઠું પકવતા અગરિયાઓના 180 ભુલકાઓ રણ છોડી સાયંસ સિટી જોવા નિકળ્યા

કચ્છના નાના રણમાં મીઠું પકવતા અગરિયા પરિવારો દુનિયાથી અલિપ્ત રહી "કાળી મજૂરી દ્વારા સફેદ મીઠું" પકવવાનું આકરૂ કામ કરે છે. અગરિયાના બાળકો પણ એમના માતા- પિતા સાથે વેરાન રણમાં કંતાનના ઝુંપડામાં રહીને રણ બસ-શાળામાં અભ્યાસ કરવાની સાથે રણમાં જ જીવન વ્યતિત કરે છે.

ત્યારે કચ્છના નાના રણમાં મીઠું પકવતા અગરિયાઓના ખારાઘોડા, ઓડું, નારણપુરા અને પાટડીના ગામોના મળીને 180 ભુલકાઓ રણ છોડી બસમાં સાયંસ સિટી જોવા નિકળ્યા હતા.

આ બાળકો રણ છોડીને બસમાં બહાર નિકળ્યા બાદ સાયંસ સિટીમાં 11 હજાર માછલીઓનું મ્યુઝિયમ, રોબટની કામગીરી, સાયંસ ટેકનોલોજી-મ્યુઝિયમ, નેચરલ પાર્ક, આદિમાનવ મ્યુઝિયમ અને ખનીજ મ્યુઝિયમ સહિતની વિજ્ઞાનની અજાયબીઓ જોઇ અચંબામાં પડ્યા હતા. અગરિયા બાળકોએ આ દ્રશ્યોને જીવનની અને કદાપી ન ભુલી શકવાની સૌથી સુખદ ક્ષણ ગણાવી હતી.

કચ્છના નાના રણની રણશાળાના 180 ઉપરાંત બાળકોએ અમદાવાદ ગુજરાત સાયન્સ-સિટીની પર્યાવરણ રક્ષક તરીકે મુલાકાત લીધી. આ મુલાકાતનું આયોજન ગુજરાત સાયન્સ-સિટી અને જનપથ તેમજ અગરિયા હિત રક્ષક મંચ દ્વારા કરવામાં આવ્યું હતુ.

ભાવનગરમા csmcri મારફત મીઠાની સારી ગુણવત્તા માટે અવનવા પ્રયોગો કરે છે. ભારત સરકારની આ સંસ્થા છે અને સમગ્ર એશિયામાં આ એક જ સંસ્થા છે. ત્યારે ખારાઘોડા, ઝીંઝુવાડા, ધ્રાંગધ્રા અને હળવદ તાલુકાના અગરિયાઓએ ભાવનગરની વિઝિટ કરવામાં આવી હતી.