માંગ:ભોગ બનનારા કર્મીને ન્યાય નહીં મળે તો હડતાલ કરીશું, પુરવઠા નિગમના કર્મીઓની જિલ્લા કલેક્ટરને રજૂઆત

વઢવાણમાં એફસીઆઇના ગોડાઉનમાં લિફ્ટિંગ ઓપરેટરને કોન્ટ્રાક્ટરના માણસે ગાળો આપી હુમલો કર્યો હતો. આ અંગે ફરજમાં રૂકાવટ અને જાનથી મારી નાખવાની ધમકી આપ્યાની વઢવાણમાં ફરિયાદ નોંધાઈ હતી. આ સંદર્ભે પુરવઠા નિગમના કર્મીઓએ કલેક્ટરને રજૂઆત કરી ભોગ બનનારને ત્વરિત ન્યાયની માંગ કરી હતી.સુરેન્દ્રનગરના ગુજરાત રાજ્ય નાગરિક પુરવઠા નિગમના કર્મચારીઓએ કલેક્ટરને કરેલી લેખિત રજૂઆત પ્રમાણે તા. 5 મેએ જિલ્લાના કર્મચારી જી. કે. મહેતા લિફ્ટિંગ મૅનેજર એફસીઆઇ વઢવાણ પર પરીવહન ઇજારાદાર કોન્ટ્રાક્ટરના પ્રતિનિધિએ અભદ્ર ભાષાનો પ્રયોગ કરી હુમલાનો પ્રયાસ કર્યો હતો.

આ બનાવમાં વારંવાર જાનથી મારી નાખવાની ધમકી અને ફરજ રૂકાવટની વઢવાણ પોલીસ સ્ટેશન ફરિયાદ નોંધાઈ હતી. આ અંગે જિલ્લાના કર્મચારીગણમાં ભયનો માહોલ છવાયો છે, જેથી કામગીરીમાં ભવિષ્યમાં પણ તકલીફ પડે તેમ છે. સરકારી કર્મચારી સાથે ભવિષ્યમાં આવું ન થાય માટે આ મામલે દાખલારૂપ કડક કાર્યવાહી કરવા માંગ કરવામાં આવી હતી.અને ભોગ બનનાર કર્મચારીને ત્વરિત ન્યાય અપાવવા જણાવ્યું હતું. જો 7 દિવસમાં આ અંગે તેમ નહીં કરાય તો કર્મચારીઓ અચોક્કસ મુદતની હડતાલ પાડી કામગીરીનો બહિષ્કાર કરીશું. જેના કારણે સરકારી યોજનાઓ ખોરંભે ચડે તો તેની કોઇ જવાબદારી અમારી નહીં રહેતી નથી. ચીમકી આપી હતી.