સફાઇ અભિયાન:સુરેન્દ્રનગર રિવરફ્રન્ટ રોડ પરથી કચરાનો નિકાલ કરાયો, પાલિકાએ સફાઇ અભિયાન હાથ ધર્યું

સુરેન્દ્રનગર આર્ટ કોલેજથી જિલ્લા પંચાયત તરફ જતાં રિવરફ્રન્ટ રોડ પર ધુળનું સામ્રાજ્ય છવાઇ ગયું હોવાની ફરીયાદ ઉઠતા પાલિકાના સેનિટેશન વિભાગ દ્વારા સફાઇ અભિયાન હાથ ધરવામાં આવ્યું હતું. જેમાં 15 થી વધુ સફાઇ કર્મચારીઓની ટીમ દ્વારા રસ્તાની સફાઇ કરી અંદાજે 1 ટનથી વધુ ધુળ અને કચરાનો નિકાલ કરવામાં આવ્યો હતો. સુરેન્દ્રનગર શહેરની ટ્રાફીક સમસ્યા હળવી બનાવવા આર્ટસ કોલેજથી જિલ્લા પંચાયત સુધી રિવરફ્રન્ટ રોડ બનાવવામાં આવ્યો છે. આથી મોટા ભાગના વાહનો અહીંથી પસાર થતા હોય છે ત્યારે આ રસ્તા પર ખુબ જ ધુળ ઉડતી હોવાથી વાહનચાલકો અને રાહદારીઓને મુશ્કેલીનો સામનો કરવો પડતો હોવાની ફરીયાદ ઉઠી હતી.

આથી પાલિકાના ચીફ ઓફીસર સંજયભાઇ પંડ્યાની સુચનાથી સેનેટરી ઇન્સ્પેક્ટર વિજયભાઇ સોલંકી સહીતની ટીમ દ્વારા સફાઇ અભિયાન હાથ ધરવામાં આવ્યું હતું. અને 15 થી વધુ સફાઇ કર્મચારીઓ તેમજ ટ્રેક્ટર સહીતના સાધનો દ્વારા રિવરફ્રન્ટના રસ્તાની સફાઇ કરી અંદાજે 1 ટનથી વધુ ધુળ અને કચરો એકઠો કરી ટ્રેક્ટરમાં ભરી ડમ્પીંગ સાઇટ પર તેનો નિકાલ કરવામાં આવ્યો હતો.