પરિવારજનોનો આક્ષેપ:સુરેન્દ્રનગરમાં કોરોના દર્દીને સારવાર ન મળતાં મોત થયાનો પરિવારજનોને આરોપ

સુરેન્દ્રનગર જિલ્લામાં કોરોના કેસો વધવાની સાથે મોત પણ થઇ રહ્યાં છે. ત્યારે કોરોનાગ્રસ્ત વૃદ્ધાને ગાંધી હોસ્પિટલ બાદ સીયુશાહ હોસ્પિટલમાં રિફર કરવામાં આવ્યા હતા. જ્યાં દર્દીને સારવાર ન મળતા મોત થયાનો પરિવારજનોએ આક્ષેપ કરતા ચકચાર ફેલાઇ હતી.

સુરેન્દ્રનગર મેડિકલ કોલેજમાં રવિવવારની મોડી રાત્રે કોરોગ્રસ્ત વૃદ્ધાને સારવાર માટે લાવવામાં આવ્યા હતા. પરંતુ એક કલાક સુધી ડોકટરની ટીમ દ્વારા સારવાર આપવામાં ન આવતા મોત થયાનો પરિવારજનોએ આક્ષેપ કર્યો હતો. આ વૃદ્ધા 75 વર્ષના તેમજ 6 દિવસ પહેલા કોરોના પોઝિટીવ આવતા ગાંધી હોસ્પિટલમાં સારવાર લઇ રહ્યા હતા.ત્યારબાદ તેઓની વધુ તબિયત બગડતા મેડિકલ કોલેજની હોસ્પિટલમાં રિફર કર્યા હોવાનું બહાર આવ્યુ હતુ.

આ ઘટનાના પગલે રોષે ભરાયેલા પરિવારજનોએ જણાવ્યુ કે, આ બનાવમાં અમારો કે હોસ્પિટલવાળાનો વાંક ? એમ્બ્યુલન્સમાંથી દર્દીને સ્ટ્રેચરમાં પણ લેવાની હોસ્પિટલ તંત્ર દ્વારા કોઇ કાર્યવાહી કરવામાં આવી ન હતી.આ માટે ડોકટરને પણ જાણ કરવામાં આવી હતી. ફરજ પરના ડોકટરે જણાવ્યું કે, મને 15 થી 20 મિનીટ પહેલા જાણ કરવામાં આવી હતી. મારી પાસે બે દર્દીઓ હતા જેમાં એક દર્દીને ઉપર રિફર કરાયુ હતુ. સ્ટ્રેચર પણ મંગાવ્યુ હતુ પરંતુ અહીં બે જ પટ્ટવાળા છે.