વેક્સિનેશન:જિલ્લાના વધુ 822 કોરોના વોરિયર્સનું રસીકરણ કરાયું, મંગળવારે 24 સ્થળે પ્રોગ્રામ હાથ ધરાયો

સુરેન્દ્રનગર જિલ્લામાં મંગળવારે 24 સ્થળે વેકસીનેશન પ્રોગ્રામ હાથ ધરાયો હતો. જેમાં વધુ 822 કોરોના વોરીયર્સે કોરોનાની રસી મુકાવી હતી. મંગળવારે પણ પોલીસ કર્મચારીઓએ ઉમળકાભેર રસી મુકાવી હતી. જોકે, રસીકરણમાં કોઇને આડઅસર થઇ હોય તેવા સમાચાર નથી.

સુરેન્દ્રનગર જિલ્લામાં તા. 16 જાન્યુઆરીથી કોરોના રસીકરણ કાર્યક્રમ હાથ ધરાયો છે. શરૂઆતના દિવસો ઓછા સ્થળે રસી મુકવાના આયોજન બાદ આરોગ્ય વિભાગે રસીકરણ કેન્દ્રોની સંખ્યા વધારતા રસીકરણ કાર્યક્રમે વેગ પકડયો છે. તેમાં પણ હેલ્થ વર્કર બાદ તા. 31 જાન્યુઆરીથી પોલીસ, નગરપાલીકા, પ્રાંત અને મામલતદાર કચેરીના સ્ટાફને રસી મુકાવવાની શરૂઆત જિલ્લામાં કરાઇ છે. જેમાં મંગળવારે જિલ્લામાં 24 સ્થળે કોરોનાની રસી મુકવાનો પ્રોગ્રામ હાથ ધરાયો હતો. મંગળવારે પણ પોલીસ કર્મીઓએ રસી મુકાવી હતી. મંગળવારે 822 કોરોના વોરીયર્સ કોરોનાથી આરક્ષીત થતા રસી મુકાવનાર કુલ કર્મીઓની સંખ્યા વધીને 8 હજારે પહોંચી ગઇ છે.