શું શીખવી ગયું 2020:કોરોના કાળમાં આરોગ્યની જાળવણીની જાગૃતતાને કારણે જિલ્લામાં સાઇકલના વેચાણમાં 20%નો વધારો

સુરેન્દ્રનગર જિલ્લા સહિત સમગ્ર રાજય અને દેશને કોરોનાએ અજગરી ભરડામાં લીધુ છે. ત્યારે કોરોના કાળના 9 માસમાં લોકોની દિનચર્યામાં પણ ફેરફાર આવ્યો છે. લોકો પોતાના આરોગ્ય પ્રત્યે વધુ સજાગ બન્યા છે. દરરોજ નિયમીત કસરત માટે સાયકલીંગ ઉત્તમ વિકલ્પ હોવાથી જિલ્લામાં સાયકલનું વેચાણ કોરોનાના સમય દરમિયાન 20 ટકા વધ્યુ છે. આ અંગે સાયલકલનો વેપાર કરતા દર્શનભાઇ શાહે જણાવ્યુ કે, જિલ્લામાં 70 જેટલી દુકાનોમાં સાયકલ વેચાય છે.

પહેલા જયાં રોજ 350 સાયકલોનું વેચાણ થતુ હતુ તેની સામે 420થી વધુ સાયકલો વેચાય છે. તેમાં પણ કોરોનાના લીધે લોકો સવારના કે સાંજના સમયે સાયકલીંગ માટે સાયકલ લઇ જતા. અમુક લોકો તો પબ્લીક ટ્રાન્સપોર્ટ કે, દ્વીચક્રી વાહનોનો ઉપયોગ ટાળવા દુકાને કે ઓફિસે સાયકલ લઇને જતા થયા છે.4 હજારથી લઇને 20 હજાર સુધીની સાયકલો બજારમાં મળે છે. જેમાં હાલના સમયમાં હાઇબ્રીડ એટલે કે, ઓછા પેડલે વધુ ચાલુ તેવી સાયકલોનું વેચાણ વધ્યુ છે.