કોરોના બેકાબુ:જિલ્લામાં ડિસેમ્બરના પ્રથમ અઠવાડિયામાં કોરોનાના નવા 105 કેસ, 25 દર્દીનાં મૃત્યુ

સુરેન્દ્રનગર જિલ્લામાં ડિસેમ્બર માસનું પ્રથમ સપ્તાહ કોરોનાના દર્દીઓ માટે આકરૂ સાબીત થયુ છે. 7 દિવસ દરમિયાન કોરોનાની સારવાર લઇ રહેલા 25 દર્દીઓના મોત થયા છે. એટલે કે, દરરોજ 3થી વધુ દર્દીઓના મોત થાય છે. સોમવારે પણ જિલ્લાનો કોરોનાથી મૃતાંક 2 નોંધાયો છે. જયારે નવા 9 કેસ ધ્યાને આવતા જિલ્લાનું કોરોનામીટર 3117 પર પહોંચ્યુ છે.સુરેન્દ્રનગર જિલ્લામાં કોરોનાથી મોતની સંખ્યા ચિંતાજનક રીતે વધી રહી છે. નવેમ્બર માસના 30 દિવસમાં કોરોનાથી 56 દર્દીઓના મોત થયા હતા. જેની સામે ડિસેમ્બરના પ્રથમ સપ્તાહમાં જ 25 કોરોનાગ્રસ્ત દર્દીઓ કાળનો કોળીયો બન્યા છે. ડિસેમ્બર માસની પહેલી તારીખે જ જિલ્લામાં રેકોર્ડબ્રેક 9 દર્દીઓના મોત થયા હતા.

ત્યારે તા. 6ના રોજ જિલ્લામાં જાણે યમરાજાએ રાખી હોય તેમ કોરોનાથી એકપણ મોત નોંધાયુ હતુ. વળી તા. 7ને સોમવારે પણ 2 કોરોનાગ્રસ્ત દર્દીઓના મોત થયા છે. જયારે સપ્તાહમાં 25ના મોતની સામે નવા 105 કેસ નોંધાયા છે અને 124 દર્દીઓએ કોરોના સામે જંગ જીત્યો છે. સોમવારે લખતર તાલુકાના અંકેવાળીયા ગામની 45 વર્ષીય મહિલા, ઢાંકીના 28 વર્ષીય યુવાન, સવલાણાના 60 વર્ષીય પુરૂષ અને લખતર શહેરની 46 વર્ષીય મહિલા સહિત 4 કેસ નોંધાયા છે. જયારે ધ્રાંગધ્રામાં 3, લીંબડીમાં 1, સાયલામાં પણ 1 કેસ નોંધાયો છે.

સોમવારના 9 કેસ સાથે જિલ્લાનું કોરોના મીટર 3117 પર પહોંચ્યુ છે. જયારે સોમવારે વઢવાણ શહેરની 60 વર્ષીય મહિલા અને તાલુકાના પ્રાણગઢ ગામે રહેતા 65 વર્ષીય પુરૂષનું કોરોનાથી મોત થયુ છે. બીજી તરફ જિલ્લામાં વધુ 72 દર્દીઓ સાજા થતા કોરોનામુકત દર્દીઓને આંક 2740 થયો છે.નોંધનીય છે કે, નવેમ્બર માસના 30 દિવસમાં કુલ 56ના મોત સામે ડિસેમ્બરના 7 દિવસના 5 લોકોના કોરોનાથી મોત થયા છે.