ઉગ્ર માંગણી:લીંબડીના જનસાળી ગામે ગેરકાયદે ચાલતું ખનન અટકાવવા ઉગ્ર માંગણી

લીંબડી તાલુકાના જનસાળી ગામે સરકારી જમીનમાં ગેરકાયદેસર રીતે માટીનું ખનન થતું હોવાની રાવ ઉઠી રહી છે. આથી જનસાળી ગ્રામ પંચાયત સભ્ય અને ગ્રામજનોએ ડેપ્યુટી કલેક્ટર, મામલતદારને લેખિત રજૂઆત કરી ગેરકાયદે ચાલતા ખનનને અટકાવવા માંગ કરી છે.

લીંબડી તાલુકાના જનસાળી ગ્રામ પંચાયતના સદસ્ય ટપુભાઈ સી.છોટીયા, જીવણભાઈ ડાભી, જયંતીભાઈ જાદવ, હરેશ ગણેશભાઈ સહિત ગ્રામજનોએ ડે.કલેક્ટર, મામલતદારને રજૂઆત કરી જણાવ્યું હતું કે જનસાળી ગામે જૂના રેવન્યુ સર્વે નં-56 સરકારી જમીનમાં સરપંચ, પંચાયતના સભ્યો ત્રણ વર્ષથી ગેરકાયદેસર રીતે માટીનું ખનન કરાવી રહ્યા છે. માટીના ગેરકાયદેસર ખનન કરી સરકારી તિજોરીને નુકસાન પહોંચાડી રહ્યા છે. જનસાળીના ગ્રામજનોએ માટીનું ખનન અટકાવવા માંગ કરી હતી.

રોયલ્ટી પાસ લેવાયો છે
સરપંચ વિજયભાઇ સોલંકીએ જણાવ્યુ કે, ગ્રામ પંચાયતની સામાન્ય સભામાં તળાવ ઊંડું થાય માટે રોયલ્ટી પાસ લઈ માટી આપવામાં આવે છે.

45 લાખથી વધુનો વહીવટ કરાયો છે
લક્ષ્મણભાઈ ઝાપડીયાએ જણાવ્યુ કે, વૃક્ષ ઉછેર મંડળના પ્રમુખ ગગજીભાઈ ગોહીલ, સરપંચ અને 6 સદસ્યો મળીને માટી વહેંચવાનો કાળો કારોબાર ચલાવી રહ્યા છે. 21 હેક્ટરમાં રૂ.45 લાખનો વહીવટ થયો છે.