કાળો કારોબાર:લીંબડીના જાખણ-ખંભલાવ-ટોકરાળાની નદીમાંથી રેતીની બેફામ ચોરી

લીંબડીએક મહિનો પહેલા
  • કૉપી લિંક
જાખણ-ખંભલાવ-ટોકરાળાની નદીમાં બેફામ રેતી અને વીજ ચોરી થઈ રહી છે. - Divya Bhaskar
જાખણ-ખંભલાવ-ટોકરાળાની નદીમાં બેફામ રેતી અને વીજ ચોરી થઈ રહી છે.
  • વૉશ પ્લાન્ટમાં થતી વીજચોરીને કારણે ગામોમાં લૉ-વોલ્ટેજ સહિત વીજ સમસ્યા વધી
  • અરજી પર તંત્ર ધ્યાન દેતું ન હોવાનો આક્ષેપ
  • 8 વૉશ પ્લાન્ટને તંત્રની મંજૂરી મળી છે પણ ચાલી રહ્યા છે અનેક

લીંબડી તાલુકાના જાખણ-ખંભલાવ-ટોકરાળા ગામની ભોગાવા નદીમાં બેફામ રેતીનો કાળો કારોબાર ચાલી રહ્યો છે. 8 વૉશ પ્લાન્ટને મંજૂરી હોવા છતાં અનેક પ્લાન્ટમાંથી રેતી ચોરી થઈ રહી છે. ગેરકાયદે અને કાયદેસર વૉશ પ્લાન્ટમાં વીજચોરી થતાં ગામમાં લૉ-વોલ્ટેજ સહિતની વીજસમસ્યા વધી ગઈ છે. હપ્તારાજ ન હોય તો કેવી રીતે થઈ શકે છે ગેરકાયદે રીતે વૉશ પ્લાન્ટો સહિત અનેક સવાલો પંથકના લોકોમાં ચર્ચાનો વિષય બની ગયા છે. મામલતદાર, ખાણ ખનીજ વિભાગમાં કરેલી અનેક અરજી કચરાપેટીમાં જતી હોવાનો ગ્રામજનોએ આક્ષેપ લગાવ્યો છે.

લીંબડી હાઈવે રોડ પર આવેલા જાખણ-ખંભલાવ-ટોકરાળાની નદીમાં પંથકના રેત માફિયાઓ બેફામ બનીને રેતી ચોરીનો કાળો કારોબાર બેરોકટોક ચાલવી રહ્યા છે. ત્રણેય ગામમાં 8 વોશ પ્લાન્ટને મંજૂરી છે. અનેક વોશ પ્લાન્ટોમાંથી રેતી ચોરીને અંજામ આપવામાં આવી રહ્યો છે. રેતી ચોરી સાથે વીજ ચોરી પણ બેફામ રીતે કરવામાં આવી રહી છે. વીજ લાઈનોમાં વાયરો નાંખી વીજ ચોરી થઈ રહી છે. જેના કારણે ત્રણેય ગામમાં લો-વોલ્ટેજ સહિત વીજ સમસ્યાઓ વધી ગઈ છે.

અમદાવાદ-રાજકોટ નેશનલ હાઈવે પર આવેલા જાખણ-ખંભલાવ-ટોકરાળા ગામની નદીમાં થતી ગેરકાયદેસર રેતી ચોરીની જાણ તંત્રને ન હોય તે માની શકાય તેમ નથી. નેશનલ હાઈવેથી ભોગાવા નદી ફક્ત 2 કિમી દૂર છે. હપ્તારાજ વગર નદીમાં ખુલ્લેઆમ રેતી ચોરી થવી અશક્ય છે. રેતીચોરી બંધ કરાવવા ખાણ ખનિજ, મામલતદાર સહિતના વિભાગોમાં કરેલી અરજી કચરા પેટીમાં જ નાંખી દેવામાં આવતી હશે તેવો ગ્રામજનોએ આક્ષેપ કર્યો છે. ત્રણેય ગામોના ગ્રામજનોએ માંગ કરી છે કે કલેક્ટર, જિલ્લા પોલીસ વડા આ અંગે કોઈ એક્શન પ્લાન તૈયાર કરે તો જ આ રેતી ચોરીનો કાળો કારોબાર અટકી શકે તેમ છે.

અન્ય સમાચારો પણ છે...