હાલાકી:કરંટથી લીંબડી સિવિલના ડાયાલિસીસ વિભાગમાં વીજળી ગુલ

લીંબડી સરકારી હોસ્પિટલના ડાયાલીસીસ સેન્ટરમાં શોક સર્કીટના કારણે વીજળી ગુલ થતા કિડનીના દર્દની સારવાર લેવા આવેલા દર્દીઓનો જીવ તાળવે ચોંટી ગયો હતો. 2 કલાક બાદ વીજ પુરવઠો કાર્યરત થતા દર્દીઓના જીવમાં જીવ આવ્યો હતો. લીંબડી સહિત અન્ય તાલુકાથી સારવાર લેવા આવતા દર્દીઓએ ડાયાલીસીસ સેન્ટરમાં અવાર-નવાર વીજ પુરવઠો ખોરવાતો હોવાનો આક્ષેપ કર્યો હતો. દૂરથી આવતા દર્દીઓને વીજ પુરવઠો બંધ હોવાને કારણે ધક્કા ખાવા પડતા હોવાનું જણાવ્યું હતું.

ડાયાલીસીસના દર્દીઓને મુશ્કેલી અંગે સિવિલના સત્તાધીશો ધ્યાન નહીં આપતા હોવાનો આક્ષેપ પણ કર્યો હતો.આ અંગે લીંબડી હોસ્પિટલના સિવિલ સર્જન મનીષાબેને જણાવ્યું હતું કે બહારની વીજ લાઈનમાં સ્પાર્ક થતા વીજળી બંધ થઈ હતી. હોસ્પિટલમાં જનરેટરની વ્યવસ્થા છે જ પણ શોટ સર્કીટના કારણે ડાયાલીસીસ વિભાગની અંદર વીજ વાયરોને કોઈ નુકસાન થયું હોવાનું લાગતા જનરેટર શરૂ કરવામાં આવ્યું નહોતું.