રહીશોમાં ફફડાટ:મોટી માલવણમાં ઝરખને પકડવા વનવિભાગના ધામા

ધ્રાંગધ્રાના મોટી માલવણની સીમમાં રવિવારે ઝરખે કૂતરાનું મારણ કર્યુ હતુ પરંતુ દિપડો હોવાની ખબર ફેલાતા ગામના લોકોમાં ભયનો માહોલ છવાયો હતો. જો કે, ફોરેસ્ટ વિભાગની ટીમે ઘટના સ્થળે જઇ પ્રાણીના પગના નિશાનની તપાસ કરતાં ઝરખ હોવાનું જણાવતા લોકોએ રાહતનો શ્વાસ લીધો હતો. આથી આ ઝરખને પકડવા ફોરેસ્ટ અધિકારી અને સ્ટાફ દ્વારા વિસ્તારમાં તપાસ કરી લોકેશન જાણી પકડવા માટેની કાર્યવાહી હાથ ધરી છે. આ અંગે ફોરેસ્ટ વિભાગના રેન્જ ફોરેસ્ટ અધિકારી કે.એ.મુલતાનીએ જણાવ્યુ કે, રણકાંઠા વિસ્તારમાં ઝખરનો વસવાટ છે. પરંતુ આ પ્રાણી લોકો પર હુમલો નથી કરતુ માટે કોઇએ ડરવાની જરૂર નથી.

વધુમાં તેમણે જણાવ્યું હતું કે, ઝરખ અને દિપડા બંન્નેના પગના નિશાનમાં ફરક હોય છે. ઝરખના પગના નિશાનમાં લાંબા લીટા પડે છે. જ્યારે દિપડાના પગમાં અને આગળની ચાર આંગળીના નિશાન જોવા મળે છે. આમ બંન્નેના પગના પંજા અલગ હોવાથી પંજાના નિશાન પણ અલગ પડે છે. જેના આધારે ફોરેસ્ટ વિભાગે મોટીમાલવણ ગામે ઝરખ પ્રાણીના પગની છાપ હોવાની પૃપ્ટી કરી છે.