માગ:વાંસદામાં આયુષ કોલેજ અને સંલગ્ન હોસ્પિટલ શરૂ કરવા ધારાસભ્યનો પત્ર

વાંસદામાં આયુષ કોલેજ તથા સંલગ્ન હોસ્પિટલ શરૂ કરવા માટે ધારાસભ્ય અનંત પટેલે ગુજરાત સરકારના વિવિધ આરોગ્ય વિભાગના અગ્રણીઓઓને પત્ર લખી રજૂઆત કરી છે. નવસારી જિલ્લાનો વાંસદા તાલુકો આદિવાસી વસતિ ધરાવતો તાલુકો છે તેમજ કુદરતી જંગલોથી આચ્છાદિત સ્થળ છે. અહીંની પ્રજા વર્ષોથી કુદરતી ઔષધિઓ દ્વારા ચિકિત્સા કરી રહ્યા છે. જેમાં કુદરતી વનસ્પતિ અને કંદમૂળમાંથી ભગતો દ્વારા તૈયાર કરવામાં આવતી દવા મહદઅંશે આયુર્વેદની દેણ છે.

વાંસદા વિસ્તારમાં હાલ સરકારી આયુર્વેદ દવાખાના છે જેનો લાભ અહીંની જનતા લઈ રહી છે તેમજ સરકાર તરફથી આ વિસ્તાર માટે આયુર્વેદ હોસ્પિટલ અને કોલેજ શરૂ કરવા લોકમાંગ ઉભી થઇ છે. સન 2010-11મા સરકારના આરોગ્ય પરિવાર કલ્યાણ વિભાગ, આદિજાતિ વિકાસ વન વિભાગ, સોસાયટી ફોર પ્રમોશન ઓફ આયુર્વેદ કોનશીયેશનેશ બાયફ અને રેડક્રોસ સોસાયટીના સંયુક્ત ઉપક્રમે આયુર્વેદ/હોમિયોપેથી કેમ્પ પણ કરવામાં આવ્યા હતા, જેમાં અંતરિયાળ ગામથી લઈને આજુબાજુના શહેરી વિસ્તારના હજારો લોકોએ લાભ લીધો હતો ત્યારબાદ સરકારી આયુર્વેદ હોસ્પિટલની માગણી કરવામાં આવી હતી.