ક્રાઇમ:મુંબઈના વેપારીનું રૂપિયાની લેતી દેતી મામલે અપહરણ

પલસાણા2 મહિનો પહેલા
  • કૉપી લિંક
રૂપિયા લેતી દેતી મુદ્દે વેપારીનું અપહરણ કરનાર પકડાયેલા આરોપીઓ. - Divya Bhaskar
રૂપિયા લેતી દેતી મુદ્દે વેપારીનું અપહરણ કરનાર પકડાયેલા આરોપીઓ.
  • વેપારી કાર ભાડે કરી આવ્યો હતો, ડ્રાઇવરે પોલીસને જાણ કરી
  • પાંચ લાખ લેવાના હોય અપરહણ કર્યાની કબૂલાત

મુંબઇના કલ્યાણથી કાર લઈને નીકળેલા એક વેપારીને પલસાણાની એક હોટલ પર બોલાવી લેણદારો તેનું અપહરણ કરી જતા કાર ચાલકે પલસાણા પોલીસ મથકમાં અજાણ્યા શખ્સો વિરુદ્ધ ફરિયાદ નોંધાવી હતી. જે ફરિયાદના આધારે તપાસ કરી રહેલી પલસાણા પોલીસે કામરેજ તાલુકાના વાવ ગામે આવેલ એન્જોય ફાર્મ હાઉસમાંથી ચાર અપહારણકર્તાઓની ધરપકડ કરી વેપારીને છોડાવ્યો હતો.

સમગ્ર ઘટના અંગે મુંબઇના કલ્યાણથી કાર ભાડે લઈને આવનાર ચાલક ખલિલ અહેમદ ઇશરાર અહમદ શેખે આપેલી ફરિયાદ મુજબ તે કલ્યાણથી રાજભાઇ દિનેશભાઇ પંડિત નામના મુસાફરે તેની કાર વાપી સુધી જવા માટે ભાડે કરી હતી. 7મી ઓક્ટોબરના રોજ તેઓ વાપી પહોંચ્યા બાદ ત્યાંથી રાજભાઈએ કાર પલસાણા ચાર રસ્તા લઈ લેવા જણાવ્યું હતું. કારમાં તેઓ રૂપિયાની લેવડ દેવડ અંગે ફોન પર વાતચીત કરતા હતા. દરમિયાન બપોરના સમયે તેમની કાર પલસાણા ચાર રસ્તા નજીક આવેલી સાબર હોટલ પર પહોંચતા ત્યાં થોડી વારમાં એક અર્ટિગા કાર નંબર જીજે 05 આર.એફ. 9635 આવી હતી.

જેમાંથી ચાર પાંચ ઈસમો ઉતર્યા હતા અને રાજભાઈને પકડીને બળજબરી પૂર્વક કારમાં બેસાડી જતા રહ્યા હતા. આ ઘટના અંગે ચાલક ખલીલે પલસાણા પોલીસમાં ફરિયાદ કરતા પોલીસે તપાસ શરૂ કરી હતી. પોલીસે કાર નંબર તેમજ ઇ ગુજકોપ એપ્લિકેશન, ટેક્નિકલ સર્વેલન્સ તથા હ્યુમન ઇન્ટેલિજન્સ દ્વારા તપાસ હાથ ધરી હતી. તે સમયે ખાનગી રાહે બાતમી મળી હતી કે, અપહરણના ગુનામાં ભોગ બનનાર અને આરોપીઓ કામરેજ તાલુકાના વાવ ગામે આવેલ એન્જોય ફાર્મ હાઉસમાં છે. જ્યાં રાજભાઈને ગોંધી રાખવામાં આવ્યા છે.

જે બાતમીના આધારે પોલીસે સ્થળ પર તપાસ કરતા ભોગ બનનાર અને ચાર આરોપીઓ મળી આવ્યા હતા. પોલીસે રાજભાઈને અપહરણ કર્તાઓની ચુંગાલમાંથી છોડાવી મનસુખ પરસોત્તમ ઉમરેઠીયા ( રહે બી.308, શ્યામ સુંદર એપાર્ટમેન્ટ, છાપરાભાઠા અમરોલી, સુરત, મૂળ રહે મોટી મોલી, તા. ઉના, જી. ગીર સોમનાથ), નજીરખાન અનાર ખાન (રહે કેસવાન, તા. વાગરા, જી.ભરૂચ ), મોઇન હમિદ ચૌહાણ (રહે. વરુ, તા. પાદરા, જી. વડોદરા) અને અખ્તર બસીર મલેક ( રહે દહેગામ, તા. જંબુસર, જી. ભરૂચ)ની ધરપકડ કરી તેમની સામે કાયદેસરની કાર્યવાહી હાથ ધરી છે.

પોલીસ પૂછપરછમાં જાણવા મળ્યું હતું કે રાજભાઈ પાસે આરોપીઓએ સાડા પાંચ લાખ રૂપિયા લેવાના હોય આરોપીઓએ તેને પલસાણા બોલાવ્યો હતો. જ્યાં રાજભાઈએ પૈસા નહીં આપતા તેનું અપહરણ કર્યું હોવાનો સ્વીકાર કર્યો હતો.

અન્ય સમાચારો પણ છે...