અકસ્માત:ડાભાં ગામે બે બાઇક સામસામે અથડાતા દંપતી પૈકી પતિનું મોત

શુક્રવારના રોજ મોડી સાંજે ડાભા ગામની સીમમાં મુખ્ય માર્ગ પર બે બાઇક વચ્ચે અકસ્માત સર્જાયો હતો, જેમાં 3 લોકોને ગંભીર ઈજાઓ પહોંચી હતી. એક બાઇક પર સવાર ખેડૂત દંપતી પૈકી ચાલકનું મોત નીપજ્યું હતું.

ડાભાં ગામે રહેતા અને ખેતી કરતા કિશોરભાઈ ઢીમ્મર અને તેની પત્ની કાતાંબેન શુક્રવારે સાંજે 6 વાગ્યાના અરસામાં બાઇક(GJ 05 HS 9843) લઈ ડાભાંથી ચલથાણ ગામના બજારમાં આવી રહ્યા હતા, જે અરસામાં ડાભાં ગામની સિમમાં આવેલ ઠાકોરજીની વાડી સામે મુખ્ય માર્ગ પર સામેની બાજુએથી (GJ 05 FT 7089 )નંબરની બજાજ પલ્સર 220 લઇ ત્રણ સીટ બેસીને ડાભા ગામ તરફ પુરઝડપે આવતા ચોર્યાસી તાલુકાના ગોજા ગામે હળપતિ વાસમાં રહેતા દિવ્યેશ મનોજ રાઠોડ અને તેના ઉમેશ રાઠોડ તેમજ મયુર ગિરીશ રાઠોડ બાઇક સાથે સામસામે ધડાકા સાથે અથડાતા અકસ્માત થયો હતો, જેમાં બાઇકચાલક કિશોરભાઈ ઢીમ્મરને ગંભીર ઈજાઓ થતા નજીકની ચલથાણ સંજીવની હોસ્પિટલમાં ખાતે સારવાર હેઠળ ખસેડવામાં આવ્યા હતા, જ્યાં તેમનું મોત નીપજ્યું હતું.

તેની પત્નીનો આબાદ બચાવ થયો હતો. તો બીજી તરફ અન્ય મોટરસાઇકલ પર ત્રણ સીટ સવાર ઉમેશ રાઠોડને સામાન્ય ઈજાઓ થતા રજા આપી હતી. તેમજ મયુર રાઠોડ અને દિવ્યેશ રાઠોડને ગંભીર ઈજા થતા સુરત સિવિલ હોસ્પિટલ ખાતે સારવાર હેઠળ ખસેડ્યા હતા. ગોજા ગામે રહેતા આ ત્રણેય યુવાનો કામરેજ ખાતે લગ્નમાંથી પરત ફરી રહ્યા હોવાનું જાણવા મળ્યું હતું. કડોદરા પોલીસે પલ્સર બાઇકના ચાલક વિરુદ્ધ ગુનો નોંધવાની તજવીજ હાથ ધરી છે.