અકસ્માત:અંત્રોલી પાસે બસ ડિવાઈડર કુદાવીને કેળના ખેતરમાં ઘુસી, મુસાફરોનો જીવ તાળવે ચોટ્યો

સુરતથી માંડવી આવી રહેલ એસટી બસના ચાલકે પલસાણા તાલુકાનાં અંત્રોલી ગામની સીમમાં સ્ટેરિંગ પરથી કાબૂ ગુમાવી દેતા બસ ડિવાઈડર સાથે ભટકાયા બાદ વીજપોલમાં અથડાતા વીજપોલ તૂટી હતો અને ત્યારબાદ બસ કેળના ખેતરમાં ઉતરી જતાં કેળના પાકને નુકશાન પહોંચ્યું હતું. સર્જાયેલ અકસ્માતમાં બસ ચાલકને ઇજા પહોંચતા સારવાર માટે હોસ્પિટલમાં ખસેડવામાં આવ્યો હતો.

પ્રાપ્ત માહિતી અનુસાર ગતરોજ એસટી બસનો ચાલક ચાલક કાંતુભાઈ સોનાભાઇ ગામિત (રહે, નવાચકરા ગામ, તા-ઉમરપાડા) તથા કંડક્ટર કાંતિલાલ બનાભાઇ ચૌધરી (રહે, ઇસર ગામ, તા-માંડવી) નાઓ એસટી બસ નંબર (GJ-18-Y-1737) લઈ રુટ નંબર-07 ઉપર માંડવીથી પેસેન્જરોને બેસાડી સુરત ગયા હતા. જ્યાં સાંજના સમયે એસટી બસ લઈ પરત માંડવી આવવા નીકળ્યા હતા. તે સમયે પલસાણા તાલુકાનાં અંત્રોલી ગામની સીમમાં અંત્રોલી પાટીયા નજીકથી પસાર થઈ રહ્યા હતા તે સમયે બસના ચાલક કાંતુભાઈએ સ્ટેયરિંગ પરથી કાબૂ ગુમાવતાં બસ ડિવાઈડર સાથે ભટકાયા બાદ વીજપોલ સાથે અથડાતાં વીજપોલ તૂટી ગયો હતો. ત્યારબાદ બસ રોડની બાજુમાં આવેલ કેળના ખેતરમાં ઉતરી જતાં કેળના પાકને તથા એસટી બસને નુકશાન થયું હતું. સર્જાયેલ અકસ્માતમાં બસ ચાલકને શરીરે ઇજા પહોંચતા સારવાર માટે સુરત સ્મીમેર હોસ્પિટલમાં ખસેડવામાં આવ્યો હોવાનું જાણવા મળે છે.