વાતાવરણ:શહેરમાં 12.4 ડિગ્રી સાથે મંગળવાર સિઝનનો સૌથી ઠંડો દિવસ નોંધાયો

12.4 ડિગ્રી સાથે મંગળવાર સિઝનનો સૌથી ઠંડો દિવસ નોંધાયો છે. સોમવારે 4 ડિગ્રી બાદ મંગળવારે વધુ 3 ડિગ્રી મળી બે જ દિવસમાં લઘુત્તમ તાપમાનમાં 7 ડિગ્રીનો ઘટાડો થતાં ઠંડીથી શહેરીજનો ઠૂંઠવાયા હતા. શહેરમાં દિવસભર 8 કિ.મીની ઝડપે ઠંડા પવનો ફૂંકાવાના કારણે વાતાવરણ ઠંડુગાર થયું હતું. 2018 ડિસેમ્બરમાં 10.6 ડિગ્રી ઠંડી નોંધાઇ હતી. આમ બે વર્ષ પછી સૌથી વધુ ઠંડીનો અનુભવ શહેરીજનોએ કર્યો હતો.

2019માં 13.8 ડિગ્રી સુધી જ ઠંડીનો પારો સરક્યો હતો. હવે આવતીકાલથી લઘુત્તમ તાપમાનમાં વધારો જોવા મળશે. સંભવત: 1થી 3 ડિગ્રી સુધી પારો ઉંચકાશે. જેથી ઠંડીનું જોર સામાન્ય ઘટશે. મંગળવારે શહેરનું મહત્તમ તાપમાન 26.8 ડિગ્રી અને લઘુત્તમ 12.4 ડિગ્રી હતું. વાતાવરણમાં સવારે ભેજનું પ્રમાણ 69 ટકા અને સાંજનું પ્રમાણ 39 ટકા રહ્યું હતું. ઉત્તર-પૂર્વ દિશાથી 8 કિ.મીની ઝડપથી પવનો ફૂંકાઇ રહ્યા છે.વેસ્ટર્ન ડિસ્ટર્બન્સ સાથે સાઇક્લોનિક સરક્યુલેશન સિસ્ટમ જમ્મુ અને કાશ્મીર ઉપર બની છે. જેથી ઉત્તર ભારતના રાજ્યોમાં એક-બે દિવસ કોલ્ડવેવ કંડીશન રહેશે.