બહેન વિના પહેલી રક્ષાબંધન:આ રક્ષાબંધને ભાઈ ધ્રુવ ગ્રીષ્માને ઘડિયાળ ગીફ્ટ કરવાનો હતો, ફેનિલથી બહેનને બચાવવા છેલ્લી ઘડી સુધી લડ્યો હતો

સુરત2 મહિનો પહેલાલેખક: સુનિલ પાલડિયા

રક્ષાબંધન એ ભાઈ અને બહેનના પ્રેમનું પ્રતીક છે. ત્યારે સુરતમાં ગ્રીષ્મા વેકરિયાનો ભાઈ બહેન પાસેથી રાખડી બંધાવવાથી વંચિત રહી ગયો છે. ગત વર્ષે રક્ષાબંધને રાખડી બધાવ્યા બાદ આ વર્ષે ગ્રીષ્માના ભાઈએ બહેનને ઘડિયાળ આપવાનું વચન આપ્યું હતું. જોકે, આ વર્ષે રક્ષાબંધન ઉજવે તે પહેલા જ ફેનિલ ગોયાણીએ ગ્રીષ્માની હત્યા કરી નાખી હતી. જેથી હવે ધ્રુવને ક્યારેય ગ્રીષ્મા રાખડી બાંધી શકશે નહીં.

ગમે તે સંજોગો હોય પણ પહેલા ગ્રીષ્મા જ રાખડી બાંધતી
ગ્રીષ્માના ભાઈ ધ્રુવે દિવ્યભાસ્કર સાથે વાતચીત કરતા જણાવ્યું હતું કે, પરિવારમાં 11 જેટલી પિતરાઈ બહેનો છે. જો ગ્રીષ્મા ક્યાંય ગઈ હોય તો તે આવ્યા બાદ જ પહેલા તેની પાસે રાખડી બંધાવતો પછી અન્ય પિતરાઈ બહેનો પાસે રાખડી બંધાવતો હતો.

ગ્રીષ્માની તસવીર સાથે પરિવારજનો.
ગ્રીષ્માની તસવીર સાથે પરિવારજનો.

ગત વર્ષની છેલ્લી રક્ષાબંધન
ગત વર્ષે ગ્રીષ્માએ ધ્રુવને રાખડી બાંધી હતી. ત્યારે ધ્રુવે ગ્રીષ્માને તેની પ્રિય રાધા-કૃષ્ણની મૂર્તિ ભેટમાં આપી હતી. જેથી તે ખૂબ જ ખુશ થઈ ગઈ હતી. જોકે, ધ્રુવે તેની બીજી પ્રિય એવી ઘડિયાળ આવતા વર્ષે એટલે આ વર્ષે આપવાનો વાયદો કર્યો હતો. ગત વર્ષે રક્ષાબંધને રાખડી બાંધી પડાવેલો ફોટો જ યાદગારીરૂપ બની ગયો છે.

ગ્રીષ્મા ભાઈ ધ્રુવ માટે પિત્ઝા-સેન્ડવીચ બનાવતી.
ગ્રીષ્મા ભાઈ ધ્રુવ માટે પિત્ઝા-સેન્ડવીચ બનાવતી.

ગ્રીષ્મા ભાઈની પ્રિય વાનગી બનાવતી
રક્ષાબંધનના આગલે દિવસે જ ગ્રીષ્માં રક્ષાબંધનની તમામ તૈયારીઓ કરી લેતી હતી. ભાઈને ભાવતા પિત્ઝા-સેન્ડવીચ, પકોડા જેવી વાનગીઓ સાથે મીઠાઈ પણ બનાવતી હતી. રક્ષાબંધનનના દિવસે તમામ પિતરાઈ ભાઈઓની સાથે ગ્રીષ્મા રક્ષાબંધન ઉજવતી હતી.

માતા અને બહેન ગ્રીષ્મા સાથે ધ્રુવ વેકરિયા
માતા અને બહેન ગ્રીષ્મા સાથે ધ્રુવ વેકરિયા

ફેનિલે 12 ફેબ્રુઆરીએ ગ્રીષ્માની હત્યા કરી હતી
સુરતમાં કામરેજના પાસોદરામાં ગત 12 ફેબ્રુઆરીના રોજ ગ્રીષ્મા વેકરિયાની એકતરફી પ્રેમમાં પાગલ ફેનિલ ગોયાણીએ ગળું કાપી ઘાતકી હત્યા કરી હતી. ત્યાર બાદ હાથની નસ કાપીને ઝેરી દવા પીવાનું નાટક કરી આપઘાતનો પ્રયાસ કર્યો હતો. ગ્રીષ્માની હત્યા કરનારા આરોપી ફેનિલને હોસ્પિટલમાંથી રજા મળતાં પોલીસે કોર્ટમાં રજૂ કરી રિમાન્ડ મેળવ્યા હતા. રિમાન્ડ પૂર્ણ થતાં જ્યુડિશિયલ કસ્ટડીમાં ખસેડાયો હતો. સમગ્ર કેસ કોર્ટમાં ચાલી જતાં જજે મૃત્યુદંડની સજા ફટકારી હતી.

માતા-પિતા અને બહેન સાથે ધ્રુવ
માતા-પિતા અને બહેન સાથે ધ્રુવ

ગ્રીષ્માને બચાવવામાં ભાઈ ઈજાગ્રસ્ત થયેલો
ગત 12 ફેબ્રુઆરીના રોજ ફેનિલ જ્યારે ગ્રીષ્માનો મારવા માટે પહોંચ્યો હતો ત્યારે ધ્રુવ જ ગ્રીષ્માને બચાવવા માટે પહોંચ્યો હતો, જેમાં તેને પણ ફેનિલે ચપ્પુનો ઘા માર્યો હતો. ત્યાર બાદ જ ફેનિલે ગ્રીષ્માનું ચપ્પુથી ગળું કાપી હત્યા કરી નાખી હતી.

ભાઈએ જ બહેનને મુખાગ્નિ આપી
15 ફેબ્રુઆરીના રોજ ગ્રીષ્માના પિતા વિદેશથી આવ્યા બાદ અંતિમયાત્રા યોજાઈ હતી. ત્યાર બાદ ભાઈના હાથે બહેન ગ્રીષ્માને અગ્નિદાહ આપવામાં આવ્યો હતો. અશ્વિનીકુમાર સ્મશાનગૃહમાં ગ્રીષ્માની યોજાયેલી અંતિમવિધિમાં સ્મશાન પણ જાણે શોક મગ્ન બની ગયું હોય એવાં દૃશ્યો સર્જાયાં હતાં. મોટી સંખ્યામાં લોકો જોડાયા હતા અને બે હાથ જોડીને વિદાય આપી હતી.

ગ્રીષ્માના ભાઈની જુબાની લેવાઈ હતી
કોર્ટમાં ટ્રાયલ દરમિયાન ભાઇની જુબાની લેવાઈ હતી. સરકાર પક્ષે મુખ્ય જિલ્લા સરકારી વકીલ નયન સુખડવાલા સમક્ષ હત્યા અગાઉનું અને હત્યા બાદનું સમગ્ર ચિત્ર ગ્રીષ્માના નાના ભાઈએ કોર્ટ સમક્ષ રજૂ કર્યું હતું. ઘટનાને શબ્દો વડે તાજી કરતાં ભાઇનું દિલ ભરાઈ ગયું હતું. તેણે કહ્યું હતું, આરોપી જ્યારે સોસાયટીના નાકે ઊભો હતો ત્યારે તેને સમજાવવા ગયો તો ચપ્પુ પેટમાં મારવા જતાં હું બચી ગયો, પછી તેણે ગ્રીષ્માને પકડી લીધી. અમે બચાવવા ગયા એ પહેલાં ચપ્પુ ફેરવી દીધું હતું.

અન્ય સમાચારો પણ છે...