આપઘાત:સરથાણાના યુવકે પાંચમાં માળેથી છલાંગ લગાવી

સરથાણામાં છેલ્લા એક વર્ષથી બેકાર યુવકે પાંચમા માળેથી પડતું મુકી જીવન ટુંકાવી લીધું તો અન્ય બનાવમાં ઘરકંકાસથી કંટાળીને સગરામપુરાના આધેડે ઝેરી દવા પી આપઘાત કર્યો હતો. મુળ જુનાગઢના ગીર સોમનાથના વતની અને હાલ યોગીચોક પેરેડાઈજ રેસિડેન્સીમાં રહેતા કેયુર રતિલાલ મારકણા(26)ના બે વર્ષ પહેલા લગ્ન થયા હતા. તેઓ છેલ્લા એક વર્ષથી નોકરી શોધી રહ્યા હતા. અંતે માનસિક તણાવમાં આવી રવિવારે પાંચમા માળેથી પડતું મુકી આપઘાત કર્યો હતો.

અન્ય બનાવમાં સગરામપુરા ચોગાન શેરીમાં રહેતા અને જરીના કારખાનામાં કામ કરતા પ્રકાશ નટવર કાટવાલા(48)નો પત્ની સાથે ઘરકંકાસ ચાલતો હતો. નાનો પુત્ર માનસિક બીમાર છે. છેલ્લા 10 દિવસથી પત્ની પુત્રને લઈ પિયરમાં જતી રહેતા એકલતાથી કંટાળીને પ્રકાશભાઈએ ઝેરી પાવડર પી આપઘાત કર્યો હતો.