કાર્યવાહી:ભાડુઆતે દુકાનના બોગસ ડોક્યુમેન્ટ બનાવી દુકાન નંબર બદલી નાંખીને કબજો કરી લીધો

સલાબતપુરામાં ભાડુઆતે દુકાનને લગતા બોગસ ડોક્યુમેન્ટ બનાવી કબજો કરી લેતા ભાડુઆત અને કહેવાતા બિલ્ડર વિરુદ્ધ લેન્ડ ગ્રેબીંગ એક્ટ હેઠળ ગુનો દાખલ કરાયો છે. ભટારમાં ઉમા ભવન પાસે જય અંબે સોસાયટીમાં રહેતા ભરત કરમચંદ તલરેજા રાધાક્રિષ્ણ ટેક્સટાઈલ માર્કેટમાં કાપડનો વેપાર કરે છે. તેમના પિતાએ 1992માં હરીઓમ માર્કેટમાં એક દુકાન ખરીદી હતી. એપ્રિલ 2010માં વેંકટેશ સોમૈયા વેમુલાએ ભરતના પિતા પાસે આ દુકાન ભાડેથી આપી હતી.

ભરતે વેંકટેશ પાસે ભાડુ માગંતા માર્કેટના બિલ્ડર કાંતિ પુનમચંદ શાહે વિશ્વાસ અપાવ્યો કે વેંકટેશ ભાડુ આપશે. સિક્યુરીટી પેટે 5.15 લાખના ચેક આપ્યા હતા. છતાં વેંટકેશે ભાડુ ન આપતા દુકાન ખાલી કરવાનું કહેતા ઉશ્કેરાઈને દુકાન મારી છે ખાલી કેમ કરૂં કહી ધમકી આપી હતી. કાંતિ શાહે પણ હાથ ઉંચા કરી દીધા હતા. વેંકટેશે બોગસ ડોક્યુમેન્ટ ઉભા કરીને દુકાનનો નંબર બદલી એસએમસીમાં પોતાનું નામ ચઢાવી દીધું હતું.જેથી વેંકટેશ અને કાંતિ વિરુદ્ધ લેન્ડ ગ્રેબીંગ એક્ટ હેઠળ ફરિયાદ નોંધાવી છે.

ભરથાણાની જમીન પચાવવાના કેસમાં નવસારીના વિક્રમ નાયકની ધરપકડ
અમરોલી ભરથાણાની જમીન પચાવી પાડવાના મામલે પોલીસે લેન્ડ ગ્રેબિંગ એક્ટના ગુનામાં કડોદરાની ડાઈંગ મિલમાં નોકરી કરતા વિક્રમ ભાસ્કર નાયક(53) (રહે,જમાલપોર,નવસારી)ની ધરપકડ કરી છે. કોર્ટે તા.19મી સુધીના રિમાન્ડ આપ્યા છે. ભરથાણામાં રહેતા ચંદ્રકાંત રતિલાલ નાયક અને તેના બે પુત્રો અને એક પુત્રી સાથે હાલ લંડનમાં છે.તેમની માલિકીની જમીનમાં બોગસ પાવર ઓફ એટર્ની આરોપી વિક્રમ નાયકે પોતાના નામે બનાવી જમીન વેચવાનો પ્રયાસ કર્યો છે. બોગસ પાવરમાં મૂળ માલિકોની જગ્યાએ અન્યોના ફોટો લગાવી મૂળ માલિકો દર્શાવ્યા હતા.ન્યુઝ પેપરમાં નોટીસ આવી ત્યારે લંડનમાં રહેતા પરિવારને આ અંગેની ખબર પડી હતી.