દોસ્ત કે દુશ્મન!:યુવતીને બદનામ કરનાર બહેનપણી જ નીકળી, સલાબતપુરાની યુવતીનું ફેક એકાઉન્ટ બનાવી ધમકી આપી હતી

સલાબતપુરાની યુવતીનું સોશિયલ મીડિયામાં ફેક એકાઉન્ટ બનાવીને બદનામ કરવાની ધમકી આપવાના ગુનામાં પોલીસે યુવતીની બહેનપણીની ધરપકડ કરી છે. નાઝનીન( નામ બદલ્યું છે) મહેંદીકામ કરીને ગુજરાન ચલાવે છે. અજાણ્યાએ નાઝનીનનું ફેક એકાઉન્ટ બનાવીને તેણીના મિત્રો પાસેથી નાઝનીનના ફોટાઓની માંગણી કરતો હતો. તેમજ ફોટો વાઇરલ કરવાની ધમકી આપતો હતો. નાઝનીને સલાબતપુરા પોલીસમાં ફરિયાદ નોંધાવી હતી.

તપાસમાં ખબર પડી કે નાઝનીનને હેરાન કરનાર કોઈ યુવક નહીં પણ તેણીની બહેનપણી મુમતાઝ( નામ બદલ્યું છે) નીકળી હતી. પૂછપરછ કરતા ખબર પડી કે નાઝનીન તેના ઓળખીતાઓમાં મુમતાઝના કેરેક્ટર અને પ્રેમી વિશે ખરાબ વાતો કરતી હતી. તેથી બદલો લેવા તેણે ફેક એકાઉન્ટ બનાવીને બદનામ કરી હતી.