શરદી-ખાંસીના કેસ વધ્યા:પાલિકાની સર્વેલન્સ ટીમ દરરોજ બે લાખથી વધુ ઘરોનું સરવે કરી રહી છે

પાલિકાની સર્વેલન્સ ટીમ ઘરે-ઘરે જઇ સરવે કરી રહી છે. સર્વેલન્સમાં પોઝિટિવની સાથે એઆરઆઇ (એક્યુટ રેસપેરટરી ઇન્ફેક્શન)ના કેસ પણ મોટી સંખ્યામાં મળી રહ્યા છે. એઆરઆઇના કેસમાં દર્દીને શરદી, ખાંસી અને શરીરમાં દુ:ખાવો જેવા લક્ષણો જોવા મળી રહ્યા છે. પાલિકાનું કહેવું છેકે વધારેમાં વધારે એઆરઆઇ કેસ સુધી પહોંચી ચેપની વહેલી તકે ઓળખ કરવામાં આવી રહી છે. નવેમ્બરના પહેલાં દિવસે 2 લાખ 17 હજાર 400 ઘરોનો સરવે કરવામાં આવ્યો હતો. જેમાં એઆરઆઇના 1509 કેસ મળ્યા હતા. જેમાં 43 લોગો ચેપગ્રસ્ત હતા. એક મહિના પછી 3 ડિસેમ્બરે 1 લાખ 89 હજાર 383 ઘરોના સરવે કરવામાં આવ્યા હતા જેમાં એઆરઆઇના 1997 કેસ મળ્યા હતા. જેમાં 77 કેસ પોઝિટિવ કેસ મળ્યા હતા.

25 નવે. સૌથી વધારે 96 પોઝિટિવ મળ્યા હતા
10 નવેમ્બરે સૌથી વધારે 2 લાખ 30 હજાર 752 ઘરોનો સરવે કરવામાં આવ્યો હતો. 17 નવેમ્બરે સૌથી ઓછા 1 લાખ 67 હજાર 144 ઘરોનો સરવે કરવામાં આવ્યો હતો. 27 નવેમ્બરે સૌથી વધારે 2 હજાર 85 એઆરઆઇના કેસ સામે આવ્યા હતા. 3 નવેમ્બરે સૌથી ઓછા 1 હજાર 44 કેસ સામે આવ્યા હતા.