તપાસ:ભેસ્તાનમાં માતા-પિતાના ઠપકા બાદ ગુમ 13.5 વર્ષની તરૂણી 32 કલાકે મળી

ભેસ્તાનની સોસાયટીમાં વેપારી મનીષ ગોયંકા( નામ બદલ્યું છે) રહે છે. પરિવારમાં પત્ની ઉપરાંત ત્રણ સંતાનો છે. તે પૈકી સાડા તેર વર્ષની દીકરી મોનિકા( નામ બદલ્યું છે) વેસુ ચાર રસ્તા પર આવેલ જાણીતી સ્કૂલમાં ધોરણ 6માં અભ્યાસ કરે છે. શનિવારે મનીષ દુકાને ગયા હતા અને તેમની પત્ની બેંકમાં ગઈ હતી. ત્રણેય સંતાનો ઘરે હતા. ત્યારે મોનિકા જાણ કર્યા વગર ચાલી ગઈ હતી.

પરિવાર અને સંબંધીઓએ તેને શોધી પરંતુ તે મળી આવી ન હતી. મોનિકાની માતાએ રવિવારે સવારે પાંડેસરા પોલીસ સ્ટેશનમાં ફરિયાદ નોંધાવી હતી. જેથી તપાસ શરૂ થઈ હતી. ત્રણ પોલીસ સ્ટેશનના 100થી વધુ કર્મચારીઓ તેને શોધતા હતા.ત્યારે મોનિકા ઉન વિસ્તારમાંથી રાત્રે આઠેક વાગ્યે મળી આવી હતી. મોનિકાને અભ્યાસ બાબતે તેના માતા-પિતા વારંવાર ઠપકો આપતા હતા. તેથી તે ઘરેથી નીકળીને ઉનમાં બે ઘરે જઈને કહ્યું કે તે એકલી છે અનાથ છે.

તેને કામની જરૂરત છે. પરંતુ બે પરિવારે તેને કામ પર રાખી નહતી. પરંતુ એક મહિલાને તેના પર દયા આવતા તેણીએ મોનિકાને ઘર કામ માટે રાખી પણ ખબર પડી કે પોલીસ શોધે એટલે પોલીસને જાણ કરી હતી.