મોંઘવારી:સુરતી ઊંધિયાના શાકભાજીની માંગ વધી, પાપડીના ભાવમાં 50, વટાણામાં 20, તુવેરમાં રૂ. 10નો વધારો

ઉતરાયણમાં સુરતી ઊંધિયું ખાવાનો ટ્રેન્ડ છે. લોકો ઘરે ઉંધયું પણ બનાવે છે તો ઘણા લોકો દ્વારા હોટલ, રેસ્ટોરન્ટમાંથી મંગાવે છે. જેને લઈને ઉંધિયામાં ઉપયોગમાં લેવામાં આવતા શાકભાજીની માંગ વધી છે. છેલ્લાં 8 દિવસમાં એપીએમસીમાં 17 લાખ કિલો વટાણા, 1.84 લાખ કિલો પાપડી અને 61 હજાર કિલો રિંગણા, 18 હજાર કિલો પાપડીની આવક થઈ છે. જો કે, શાકભાજીની આવકમાં તો વધારો થયો છે તેમ છતાં ડિમાન્ડ વધારે હોવાથી ભાવમાં પણ વધારો થયો છે. માત્ર એક જ દિવસમાં તુવેરના ભાવમાં 10 રૂપિયા, પાપડીના ભાવમાં 50 રૂપિયા, વટાણાના ભાવમાં 20 રૂપિયા અને ગાજરના કિલો દિઠ ભાવમાં 10 રૂપિયાનો વધારો થયો છે.

માંગ વધતા શાકભાજીના ભાવમાં વધારો થયો
એપીએમસીના ડિરેક્ટર બાબુ શેખે કહ્યુ કે, ‘ઉતરાયણના તહેવારમાં ઉંધિયું ખાવાનું સુરત શહેરમાં ચલણ છે. દરેક ધર્મના લોકો ઉતરાયણના તહેવારની ઉજવણી ધામધૂમથી કરે છે. આ વર્ષે પણ ઉતરાયણાં ઉંધિયાનું ચલણ છે ત્યારે તેને લઈને ઉંધિયામાં ઉપયોગમાં લેવામાં આવતા શાકભાજીની માંગમાં વધારો થયો છે. જેથી ભાવ વધ્યા છે.