ક્રાઇમ:સચિનમાં પ્રેમિકાની આત્મહત્યા કેસમાં પ્રેમી સામે દુષ્પ્રેરણાનો ગુનો

સચિનમાં પ્રેમીએ લગ્ન કરવાનો ઇન્કાર કરતા પ્રેમિકાએ આપઘાત કરવાના બનાવમાં પ્રેમી વિરૂદ્ધ સચિન પોલીસમાં આત્મહત્યાની દુષ્પ્રેરણા આપવાનો ગુનો નોંધાયો છે. સચિન ખાતે આવેલી એક સોસાયટીમાં રહેતા સુરજ રામચરણ યાદવે સચિન વિસ્તારમાં રહેતા કવિતા (નામ બદલ્યું છે)ને પોતાના પ્રેમજાળમાં ફસાવી હતી. ત્યારબાદ સુરજ યાદવે કવિતાના માતા પિતાને પોતે લગ્ન કરવાનો હોવાનું કહીને તેની સાથે બે વર્ષ સુધી સંબંધ રાખ્યો હતો. આમ બે વર્ષ સુધી કવિતા ને લગ્નની લાલચ આપી તેની સાથે સંબંધ બાંધનાર સુરજે બે દિવસ પહેલાં અચાનક યુ ટર્ન લીધો હતો.

સુરજે બે દિવસ પહેલા પ્રેમિકા કવિતાને પોતાના લગ્ન અન્ય યુવતી સાથે થવાના હોવાનું કહેતા કવિતા ડિપ્રેશનમાં આવી ગઇ હતી. સુરજે તેની સાથે આટલો સમય સુધી લગ્નના નામે સંબંધ રાખી તરછોડી દેતા તેણીએ ફાંસો ખાઇ આત્મહત્યા કરી લીધી હતી. કવિતા દ્વારા આત્મહત્યા કરવાના બનાવ અંગે સચિન પોલીસે પ્રેમી સુરજ યાદવ વિરૂદ્ધ આત્મહત્યાની દુષ્પ્રેરણા આપવાનો ગુનો નોંધી તપાસ શરૂ કરી છે.