માગણી:દક્ષિણ ગુજરાતના પાસ હોલ્ડરોને ઇન્ટરસિટી, મેમુ, શટલમાં ‘ટિકીટ’ને બદલે ‘પાસ’થી મુસાફરી કરવા દો: ચેમ્બર

ચેમ્બર ઓફ કોમર્સ એન્ડ ઇન્ડસ્ટ્રી દ્વારા રેલ્વે મંત્રી પિયુષ ગોયલને દક્ષિણ ગુજરાતના પાસ હોલ્ડરો માટે ઇન્ટરસિટી, મેમુ અને શટલ ટ્રેનોમાં ‘ટિકીટ’ને બદલે ‘પાસ’થી મુસાફરી કરવા દેવામાં આવે તેવી માંગ સાથે રજૂઆત કરી છે.

ચેમ્બરની રેલ્વે કમિટીની મિટીંગમાં કમિટીના ચેરમેન રાકેશ શાહે કમિટીના વિવિધ સભ્યો સાથે દક્ષિણ ગુજરાતમાંથી ટ્રેનોમાં મુસાફરી કરી રહેલા મુસાફરોને પડી રહેલી વિવિધ સમસ્યા વિશે ચર્ચા કરી હતી. જેમાં ખાસ કરીને દક્ષિણ ગુજરાતમાંથી ગુજરાત તથા મહારાષ્ટ્રના વિવિધ સ્થળે નોકરીએ જતા નોકરીયાત વર્ગ આર્થિક રીતે મુશ્કેલીનો સામનો કરી રહ્યા છે. કારીગર વર્ગને ટિકીટ પેટે રોજના રૂ. 200થી 300 ખર્ચવા પડી રહ્યા છે. લોકડાઉન પહેલા દક્ષિણ ગુજરાતનો કારીગર વર્ગ ‘પાસ’થી મુસાફરી કરી રહ્યો હતો, પરંતુ લોકડાઉન દરમ્યાન કરાયેલા તેમજ અત્યારે પણ હયાત પ્રાવધાન મુજબ તેઓને રિઝર્વેશનથી ટિકીટ લઇને મુસાફરી કરવી પડે છે. આથી કારીગર વર્ગને આર્થિક મુશ્કેલીમાંથી બહાર કાઢવા પાસ હોલ્ડરો ‘ટિકીટ’ને બદલે ‘પાસ’થી મુસાફરી કરી શકે તેવી વ્યવસ્થા ગોઠવવા માંગ કરી છે.