કાર્યવાહી:રાંદેર જુગાર કલબ, 39 સામે 27 કલાકે FIR, 49 વોન્ટેડ, પકડાયેલા પૈકી મોટેભાગના વડીલો નીકળ્યા

વિજીલન્સની ટીમે રાંદેરમાં આરીફ કોઠારીની જુગારની ક્લબ પરથી 39 જુગારી પકડયા હતા. શનિવારે સવારે 11.30 વાગ્યે દરોડાની કાર્યવાહી કરી તે રવિવારે બપોરે 2.30 વાગ્યા સુધી ચાલી હતી. પછી વિજીલન્સે મોડી સાંજે રાંદેર પોલીસમાં જુગારધારાની ફરિયાદ નોંધાવી હતી. પકડાયેલા જુગારીઓમાં મજૂરીકામ, કાપડનો વેપારી, નોકરીયાત, ખેતી, રિક્ષાચાલક, શાકભાજી, બુક બાઇડીંગ, પાનનો ગલ્લો, માલીસ ઉપરાંત 4 થી 5 જણા નિવૃતો જુગાર રમવા આવતા હતા. જયારે આરીફ કોઠારી, યોગેશ ટંડેલ, રાઇટરો પાસેથી પૈસા લેનાર નઇમ, 7 મોબાઇલ ધારકો તેમજ 39 વાહનચાલકો સહિત 49 વોન્ટેડ જાહેર કર્યા છે.

વધુમાં વિજીલન્સની કોઈને ગંધ ન આવી જાય તે માટે અમુક સ્ટાફને રેડની ખબર હતી. છેલ્લા 7 માસ જુગારની ક્લબ આરીફ કોઠારી ચલાવતો હતો અને તેનું હેન્ડલિંગ યોગેશ ટંડેલ કરતો હતો. જુગારની ક્લબ પરથી એક શખ્સ વિજિલન્સના નામે હપ્તો લઈ જતો હોવાની વાત પોલીસ બેડામાં ચર્ચાઈ છે. જુગારની ક્લબ કોના કહેવાથી શરૂ થઈ તે મોટો સવાલ છે. ડીજીપી રાંદેર પોલીસ સામે શિક્ષાત્મક પગલા ભરે તેવી શકયતા છે.