નર્મદ યુનિવર્સિટી:વિદ્યાર્થીઓને રોજગારી માટે પ્લેસમેન્ટ ઓફિસરનો પ્રસ્તાવ

નર્મદ યુનિવર્સિટીમાં 23 ફેબ્રુઆરી, 2021એ સેનેટની ઓફલાઇન બેઠક મળનારી છે. તેવામાં જ વિદ્યાર્થીઓને રોજગારી મળે તે માટે સેનેટ સભ્ય મનીષ કાપડીયાએ પ્લેસમેન્ટ ઓફિસરની નિમણૂક કરવા માટેનો પ્રસ્તાવ સેનેટમાં મૂકયો છે. સેનેટ સભ્ય મનીષ કહે છે કે, યુનિવર્સિટીમાં અંડર અને પોસ્ટ ગ્રેજ્યુએટનો અભ્યાસ પૂર્ણ કર્યા બાદ વિદ્યાર્થીઓ રોજગારી શોધતા હોય છે.

જોકે, આપણી યુનિવર્સિટીમાં રોજગારી કચેરી છે. પણ યુનિવર્સિટીની કોલેજોના વિદ્યાર્થીઓને રોજગારી મળે તે માટે યુનિવર્સિટીમાં પરમેનન્ટ કોમન પ્લેસમેન્ટ ઓફિસરની નિમણૂક કરવી ફરજિયાત છે. સાથે એસજીસીસીઆઇ સાથે મળીને વિદ્યાર્થીઓને દેશ વિદેશની સંસ્થામાં રોજગારી મળે તેવા રોજગાર મેળા યોજાય તેવો મારો પ્રસ્તાવ છે. સેનેટ સભ્ય મનીષે અન્ય પ્રસ્તાવ મૂક્યા છે કે યુજીસીની ગાઇડ લાઇન મુજબ યુનિવર્સિટી અને કોલેજોમાં જીએસનું ઇલેક્શન જનરલ પધ્ધતિથી કરવામાં આવે છે. કોવિડ-19ને કારણે સેનેટ સભા નહીં મળતા આ વખતની સભામાં આ પ્રસ્તાવ ફરી મૂકાયા છે.

‘અધ્યાપકોની 3-3 બેઠક સિન્ડી.-સેનેટમાં આપો’
સેનેટ સભ્ય ડો. નિમેષ માલીએ સેનેટમાં પ્રસ્તાવ મૂકયો છે કે, સિન્ડિકેટમાં અધ્યાપકોની ત્રણ અને સેનેટમાં વિદ્યાશાખા મુજબ ત્રણ અધ્યાપકોની બેઠક કરવામાં આવે.