દુખદ:નાટ્યકાર વસંત ઘાસવાલાનું 88 વર્ષે કોરોનાથી અવસાન

એસએમસીની નાટ્ય સ્પર્ધામાં 25 વખત અને ગુજરાત રાજ્ય સંગીત નાટ્ય અકાદમીની નાટ્ય સ્પર્ધામાં 15 વખત બેસ્ટ એક્ટિંગનો એવોર્ડ મેળવનાર સુરતના જાણીતા નાટ્યકાર વસંત ઘાસવાલાનું 88 વર્ષે કોરોનાથી અવસાન થયું છે. વસંત ઘાસવાળાએ પોતાની લાંબી કારકિર્દી દરમિયાન સુરતની પાંચ પેઢીના કલાકારો-દિગ્દર્શકો સાથે કામ કર્યું અને તેમના જીવનના અંતિમ સમય સુધી રંગભૂમિ પર સક્રિય રહ્યા.

તેમણે અનેક નાટકોમાં કામ કર્યું, જે પૈકી મૃગજળનું સગપણ, હું તમે ને મસ્તરામ, આગગાડી, લોપ-અલોપ, રાક્ષસ, રાજભોગ, ધૂમ્રસેર, મિલીના ઘર તરફ, વહાલના વારસદાર વગેરે મુખ્ય છે. ગઈકાલે મધ્યરાત્રીથી તેમની તબિયત લથડી હતી અને તેમણે વેન્ટીલેટર ઉપર રાખવામાં આવ્યા હતા. આજે મોડી બપોરે એમણે અંતિમ શ્વાસ લીધા હતા. આ દુઃખદ સમાચાર બાદ સુરતના તમામ નાટ્યકર્મીઓ ઊંડા શોકમાં ગરકાવ થઇ ગયા હતા.