કોરોનામાં કૌભાંડ:સુરતમાં પોઝિટિવ દર્દીઓ માટે પાલિકાએ 82 હજારના ભાડે 10 એમ્બ્યુલન્સ લીધી, કોન્ટ્રાક્ટરે શબવાહિનીઓ પધરાવી દીધી

સુરત2 વર્ષ પહેલાલેખક: આશિષ મોદી
પાલિકાએ કોન્ટ્રાક્ટ હેઠળ લીધેલી એમ્બ્યુલન્સ ફાયર સ્ટેશન પર તૈનત કરવામાં આવી છે.
  • કોન્ટ્રાક્ટ પર લેવાયેલી 10 એમ્બ્યુલન્સમાંથી 4 આરોગ્યને અને 6 ફાયર સ્ટેશન પર તૈનાત કરાઈ છે
  • કોન્ટ્રાક્ટ હેઠળની શબવાહિનીમાં ચાલતી એમ્બ્યુલન્સની જગ્યાએ અન્ય એમ્બ્યુલન્સને કોલ મળે છે

શહેરમાં કોરોના સંક્રમણ વધતા મહાનગરપાલિકા દ્વારા વ્યવસ્થાઓ ઉભી કરવામાં આવી રહી છે. જેમાં દર્દીઓને લાવવા-લઈ જવા માટે કોન્ટ્રાક્ટ હેઠળ એમ્બ્યુલન્સ રાખવામાં આવી છે. પાલિકા દ્વારા કોન્ટ્રાક્ટ પર 10 એમ્બ્યુલન્સ રાખવામાં આવી છે. જેમાંથી ચાર આરોગ્ય વિભાગને અને બાકીની છ એમ્બ્યુલન્સ ફાયર સ્ટેશન પર સ્ટેન્ડ બાય તરીકે રાખવામાં આવી છે. જોકે, આ એમ્બ્યુલન્સ ઓક્સિજન-વેન્ટિલેટર વિનાની શબવાહિનીઓ કોન્ટ્રાક્ટરે પધરાવી દીધી હોવાનું સામે આવ્યું છે. સાથે જ આ એમ્બ્યુલન્સનો કોઈ જ ઉપયોગ ન થતો હોવાથી કૌભાંડ આચરવામાં આવી રહ્યું હોવાની આશંકા સેવવામાં આવી રહી છે. 

કોન્ટ્રાક્ટની અમ્બ્યુલન્સ ધૂળ ખાય છે
દર્દીઓને ઘરેથી લાવવા-મૂકવા કે હોસ્પિટલ લઈ જવા સહિતની સુવિધા ઉભી કરવા માટે પાલિકા દ્વારા એમ્બ્યુલન્સ કોન્ટ્રાક્ટ પણ આપવામાં આવ્યો છે. આ અંગે ફાયર ઓફિસર કહીં રહ્યા છે કે, હાલ 10 એમ્બ્યુલન્સ (ટવેરા અને તુફાન ગાડી)મહિના દીઠ 82 હજારના કોન્ટ્રાકટ પર લેવાઈ છે. જ્યારે એમ્બ્યુલન્સના માલિકો કહીં રહ્યા છે કે, અમને 65 હજાર જ આપવાની વાત થઈ છે. હાલની માહામારી સામે 108ની સેવા સહિત અનેક ખાનગી એમ્બ્યુલનસવાળાઓ સુવિધા સાથે કામ કરતા હોવાના કારણે પાલિકાના કોન્ટ્રાકટ હેઠળની એમ્બ્યુલન્સ ધૂળ ખાય રહી હોવાનું નામ ન જણાવવાની શરતે જાણવા મળ્યું છે.

તમામ સુવિધા હોવાનો દાવો
રાકેશ પટેલ (ખાનગી એમ્બ્યુલન્સના સંચાલક) કહે છે કે, મને 7 દિવસમાં લગભગ 40 કેસ મળ્યા હશે, મારી એમ્બ્યુલન્સમાં ઓક્સિજન, વેન્ટિલેટર, બાયપેપ જેવી તમામ સુવિધાઓ છે. ડોક્ટર કહે છે કે, કોરોના પોઝિટિવ દર્દીઓના ટ્રાન્સફરમાં આ તમામ સુવિધાઓ હોય એ જ એમ્બ્યુલન્સ ઉપયોગમાં લઈ શકાય.

82 હજારમાં કોન્ટ્રાક્ટ અપાયો છે-ફાયર ઓફિસર
ફાયર ઓફિસર બસંત પરીખે જણાવ્યું હતું કે, વધતા જતા કોરોનાના કેસને લઈ 10 એમ્બ્યુલન્સ ઓન કોન્ટ્રાકટ લેવાઈ છે. જેમાં 4 એમ્બ્યુલન્સ આરોગ્ય વિભાગને હેન્ડ ઓવર કરાઈ છે અને 6 એમ્બ્યુલન્સ ફાયર સ્ટેશન પર તૈનાત કરાઈ છે. તમામ એમ્બ્યુલન્સ 3 મહિનાના કોન્ટ્રાકટ પર લેવાઈ છે. એમ્બ્યુલન્સ દીઠ પાલિકા 82 હજાર રૂપિયા કોન્ટ્રાક્ટરને આપી રહી છે. છેલ્લા 7 દિવસમાં ફાયર સ્ટેશન દીઠ એમ્બ્યુલન્સને કેટલા કોલ કર્યા એ માહિતી ભેગી કરવી અશક્ય નહીં પણ ખૂબ જ અઘરી છે.

કોન્ટ્રા્કટ હેઠળની એમ્બ્યુલન્સમાં સુવિધાનો અભાવ
માહામારીમાં પાલિકાએ ઓન કોન્ટ્રાકટ 26 પ્રાઇવેટ શબવાહીનીઓને એમ્બ્યુલયન્સ તરીકે લીધી હોય તેવું સામે આવી રહ્યું છે. કોરોના પોઝિટિવ દર્દીઓના ટ્રાન્સપોર્ટેશન માટે લેવાયેલી ટવેરા અને તુફાન જેવી ગાડીઓમાં ઓક્સિજન કે દર્દીને ઉપાડવાની જોળી જેવી પ્રાથમિક સુવિધાઓ પણ ન હોવાનું દેખાય આવે છે. તમામ ગાડીઓ ફાયર સ્ટેશન બહાર તૈનાત કરાઈ છે. જગુ દેસાઈ નામના વ્યક્તિને રાતોરાત આખો કોન્ટ્રાકટ અપાયો હોવાનું કહેવાઈ રહ્યું છે. સિવિલના તમામ શબવાહીનીની ગાડીઓ વાળાને કોન્ટ્રાકટ અપાયો હોવાનું સામે આવ્યું છે. જશવંત નામના વ્યક્તિને 3 ગાડીઓ (મજુરા ફાયર સ્ટેશન), બાલુને 3 (ડીંડોલી ફાયર સ્ટેશન), અશોકને 1 ( ડીંડોલી ફાયર સ્ટેશન), જીતુ કહારની 1 (કતારગામ ફાયર સ્ટેશન), અજીતની 1 (માન દરવાજા ફાયર સ્ટેશન) અને વિજય અને ભરતની 1-1 (કાપોદ્રા ફાયર સ્ટેશન) પર ગાડીઓ મૂકાઈ છે.

સાત દિવસમાં એક કોલ કર્યો
ડીંડોલી ફાયર સ્ટેશન પર તૈનાત એમ્બ્યુલન્સે સાત દિવસમાં 1 કોલ કર્યો છે. જ્યારે મજૂરાવાળાએ પણ 1 કોલ કર્યો છે. લગભગ 3 મહિનાનો કોન્ટ્રાકટ છે. મજુરા ફાયર સ્ટેશન અને માન દરવાજાની ગાડી 1 જુલાઈથી તૈનાત છે અને 2 કોલ કર્યા છે.આ ફાયર સ્ટેશનવાળા કહે છે કે, અમારે ત્યાં 108ની ટીમ જ કોરોનાગ્રસ્ત દર્દીઓને શિફટિંગ કરે છે. તમામને પાલિકાના કંટ્રોલ રૂમમાંથી કોલ મળે છે. જોકે, યોગ્ય કોમ્યુનિકેશન કે પછી કોઈ અન્ય કારણોસર કોન્ટ્રાક્ટ હેઠળની એમ્બ્યુલન્સ ધૂળ ખાય રહી છે.

કોન્ટ્રાક્ટ પાછળ રાજકીય ખેલની આશંકા
હાલ રાજ્ય સરકારની 108 સહિત હોસ્પિટલની પોતાની અને સિવિલ-સ્મીમેરની પણ એમ્બ્યુલન્સ કાર્યરત છે. આવા સમયે કોન્ટ્રાક્ટ હેઠળની એમ્બ્યુલન્સને 65000માં કોન્ટ્રાક્ટ મળ્યો હોવાનું કોન્ટ્રાક્ટર કહી રહ્યાં છે. 24 કલાક ઓન રોડ રહેવા ઓર્ડર કરાયો છે. ત્યારે 108ની લગભગ તમામ એમ્બ્યુલન્સ કોરોનાગ્રસ્ત દર્દીઓના ટ્રાન્સપોર્ટમાં ચાલતી હોવા છતાં પ્રાઇવેટ એમ્બ્યુલન્સને કોન્ટ્રાકટ આપવા પાછળ રાજકીય ખેલ શું છે તેવા પ્રશ્નો ઉભા થયા છે. કારણ કે આ ગાડીમાં કોઈ સુવિધા નથી પરંતુ સેનિટાઈઝર, ગ્લવ્ઝ, માસ્ક અને કીટ પાલિકા આપી રહી છે.