વિરોધ:સફાઈ કામદારોનું અપમાન થતાં SMCમાં હોબાળો

SMCના લિંબાયત ઝોનના ડીંડોલી- 2 વોર્ડ ઓફિસના આરોગ્ય વોર્ડના મુકાદમ, એસ.એસ.આઇએ સફાઇ કામદારોને જાતિવિષયક અપશબ્દો બોલી દુર્વવ્યહાર કરતા હોવાની ફરિયાદ સાથે મહિલા કામદારોએ પાલિકાની મુખ્ય કચેરી ખાતે હલ્લાબોલ કર્યો હતો. સફાઇ કામદારોએ ડીંડોલી વોર્ડ ઓફિસના મુકાદમ પ્રભાત સોલંકી, એસ.એસ.આઇ સોનવણે, એસ.આઇ એ.બી પટેલ તેમજ લિંબાયત ઝોનના નાયબ આરોગ્ય અધિકારી ડો.સંજય દાસના નામની પણ હાયહાય બોલાવી હતી.

કામદારોએ આક્ષેપ કર્યો હતો કે, અનુસુચિત જાતિના કર્મચારીઓ સાથે જાતિવિષયક વાતો કરી અપમાન કરાઈ રહ્યું છે. તેઓ માનસિક હેરાનગતિ અનુભવી રહ્યા છે. જેથી સ્થળ પર જઇને તપાસ કરીને આ અધિકારીઓ સામે કાર્યવાહી કરવાની માંગણી કરી છે.