• Gujarati News
  • Local
  • Gujarat
  • Surat
  • 30 Crores Of Undhia Are Snatched In A Day, The BJP Leader's Family In Surat Has 'ruled' On The Undhia Test For 80 Years.

ટેસ્ટ ઓફ ગુજરાતઉત્તરાયણની ખરી મજા તો સુરતી ઊંધિયા સાથે જ!:એક દિવસમાં 30 કરોડનું ઊંધિયું ઝાપટી જાય, સુરતમાં ભાજપના નેતાના ફેમિલીનું 80 વર્ષથી ઊંધિયાના ટેસ્ટ પર 'રાજ'

સુરતએક મહિનો પહેલાલેખક: દેવેન ચિત્તે

ખાવાના શોખીન ગુજરાતીઓની પ્રિય વાનગીઓમાંની એક વાનગી છે ઊંધિયું. એમાં પણ ઉત્તરાયણ આવે એટલે પતંગ-દોરીની સાથે ઊંધિયું જ જોઈએ. ઉત્તરાયણમાં જમવાના મેનુમાં એક અનિવાર્ય વાનગી તરીકે ઊંધિયું તો હોય ને હોય જ. ઊંધિયું મૂળે સુરતની વાનગી છે, જેની સુવાસ અત્યારે આખા ગુજરાતમાં ફેલાઈ ગઈ છે. સુરતમાં ભાજપ નેતા નીતિન ભજિયાવાળાનો પરિવાર છેલ્લાં 80 વર્ષથી ઊંધિયાના ટેસ્ટ પર રાજ કરી રહ્યો છે. સમય જતાં ઊંધિયું બનાવવાની પદ્ધતિમાં ફેરફાર આવ્યો છે ને માટલા ઊંધિયાની પરંપરા બીજા પ્રકારે લઈ લીધી છે. જોકે, ટેસ્ટમાં કોઈ જ ફેરફાર થયો નથી.

સુરતી ઊંધિયાનો ઇતિહાસઃ ઊંધા માટલાથી નામ પડ્યું ઊંધિયું
ઊંધિયું શબ્દ એ ઊંબાડિયાનો અપભ્રંશ થઈને આવેલો શબ્દ છે. ઊંબાડિયું બનાવવાની જે પદ્ધતિ છે એ જ પદ્ધતિથી ઊંધિયું બને છે. પરંતુ સમયના પ્રવાહની સાથે અને આધુનિકતાની સાથે સાથે ઊંધિયું બનાવવાની પદ્ધતિમાં પણ ધરખમ ફેરફાર થયા છે. ઊંબાડિયું શબ્દ કેવી રીતે પ્રચલિત થયો તેનો પણ ખૂબ જ રોચક ઇતિહાસ છે. ગાયના છાણમાંથી જે છાણા તૈયાર થાય છે. જેને ઉબલા કે ઉપલે કહેવાય છે. માટલું ઊંધું વાળીને છાણા ઉપર મૂકવામાં આવે છે. માટલામાં પહેલા શાકભાજી મૂકી દેવામાં આવે છે ત્યારબાદ તેને ચારે તરફથી છાણા એટલે કે ઉભલા સળગાવીને મૂકવામાં આવે છે. આના તાપથી માટલામાં મૂકેલી શાકભાજી શેકાઈને તૈયાર થઈ જાય છે. તેને ઊંબાડિયું કહેવામાં આવે છે. આ જ પદ્ધતિથી ઊંધિયું પણ બનાવવામાં આવે છે જે તેની ખરી પદ્ધતિ માનવામાં આવે છે. ઊંધા માટલા કરીને બનાવવામાં આવતું ઊંબાડિયું ઊંધિયું તરીકે લોકજીભે ચડી ગયું અને ત્યારથી ઊંધિયું શબ્દ ભાષાકીય રીતે ઉપયોગમાં લેવાતો થયો.

ભજિયાવાળા પરિવાર સ્વાદ પ્રિય પ્રજાને પીરસી રહ્યો છે ઊંધિયું
સુરતના મોડ કોર્ટ વિસ્તારના ચૌટાબજારમાં જોષી (ભજિયાવાળા) પરિવાર આજે પણ પાંચમી પેઢીએ ઊંધિયું બનાવી રહ્યો છે. ધનજીભાઈ જોષીનો પરિવાર આજે પણ એ જ સ્થળ ઉપર સુરતના ઐતિહાસિક ચૌટાબજારમાં જ ઊંધિયું બનાવીને સુરતી સ્વાદપ્રિય પ્રજાને પીરસી રહ્યું છે. ધનજીભાઈ જોષી, જયશંકર ધનજીભાઈ જોષી, દેવપ્રસાદ જયશંકર જોષી, નીતિન દેવપ્રસાદ જોષી, કૃણાલ નીતિનભાઈ જોષી આજે પરિવારનો વારસો સંભાળી રહ્યા છે.

1942માં જ્યાં શરૂઆત કરી ત્યાં આજે પાંચમી પેઢી બનાવે છે ઊંધિયું
જોષી પરિવારના નીતિનભાઈ જોષીના જણાવ્યા મુજબ સરકારી દસ્તાવેજના આધારે માનીએ તો સુરતના ચૌટાબજાર ખાતે તેમની દુકાન 1942થી કાર્યરત છે. તેઓ ઉમેરે છે કે આ સત્તાવાર ગવર્મેન્ટના ડોક્યુમેન્ટ ઉપર લખાયેલું વર્ષ છે. પરંતુ અમારો પરિવાર તેના કરતાં પણ થોડાં વર્ષો પહેલાંથી ઊંધિયું સહિત અનેક ફરસાણની વાનગીઓ પણ બનાવતું હતું. આજે અમારી પાંચમી પેઢી ઊંધિયું બનાવી રહી છે. સમયની સાથે ઊંધિયાના પ્રકારોમાં અને તેની બનાવવાની પદ્ધતિમાં ફેરફાર થયા છે પરંતુ દાયકાઓથી જે સુરતીઓ ઊંધિયાનો આસ્વાદ મળે છે તે આજે પણ અંકબંધ છે.

ઊંધિયું બનાવવાની ખરી પદ્ધતિ
ઊંધિયું બનાવવા માટે કતારગામની 3 દાણાની પાપડી, રતાળુ, બટાટા, રીંગણના રવૈયા, શક્કરિયા, લીલો મસાલો, મુઠિયા વગેરેનો સામાન્ય રીતે ઉપયોગ થતો હોય છે. ઊંધિયું બનાવવાની બે પદ્ધતિ સૌથી વધારે ચલણમાં છે. એક પદ્ધતિ કે જેમાં પાપડીને પહેલા બાફી લેવામાં આવે છે. ત્યારબાદ પાપડી, રતાળુ, બટેટા, રવૈયા (રીંગણ), શક્કરિયાને એક સાથે બાફી લેવામાં આવે છે. બરાબર તમામ શાકભાજી બાફી લીધા બાદ તેને મસાલામાં એકત્રિત કરવામાં આવે છે.

શાકભાજીને તળીને પણ બનાવે ઊંધિયું
ઊંધિયું બનાવવા માટેની બીજી એક પદ્ધતિ એવી છે કે પહેલા પાપડીને બાફી લેવામાં આવે છે. ત્યારબાદ રતાળુ, રવૈયા, બટેટા, શક્કરિયા આ તમામ શાકભાજીને તેલમાં તળી લેવામાં આવે છે. તેનામાં લીલો મસાલો ઉમેરીને ઊંધિયું તૈયાર કરાય છે. આ ઊંધિયું બનાવવાની પદ્ધતિનો લાભ એ છે કે વધુ સમય સુધી ઊંધિયું સ્વાદિષ્ટ રહે છે. તમામ શાકભાજીને બાફીને બનાવેલું ઊંધિયું લાંબા સમય સુધી ટેસ્ટી રહેતું નથી. જ્યારે શાકભાજીને તળીને બાફેલી પાપડી સાથે મિક્સ કરીને મસાલા સાથે તૈયાર કરવામાં આવે છે તે લાંબા સમય સુધી પણ સ્વાદિષ્ટ રહી શકે છે.

લીલા મસાલાને બદલે લાલ મસાલો
ઊંધિયું બનાવવાની ત્રીજી પદ્ધતિમાં તમે ઉપરની કોઈપણ પદ્ધતિને અનુસરી શકો છો પરંતુ તેની અંદર જે લીલો મસાલો હોય છે તે મસાલાને બદલે લાલ મરચાનો ઉપયોગ કરવામાં આવે છે. આ ઊંધિયાનો રંગ લાલ મરચું હોવાને કારણે લાલ દેખાશે જે ગ્રીન ઊંધિયા કરતાં થોડું સ્વાદમાં અલગ પણ હશે અને દેખાવમાં પણ તે અલગ હશે. જે લોકો લીલો મસાલો ખાવાથી દૂર રહેતા હોય છે તેમની પાસે લાલ મરચાથી તૈયાર થયેલા ઊંધિયાનો વિકલ્પ પણ રહે છે પરંતુ મોટે ભાગે માત્ર પાંચ ટકા જેટલા લોકો જ લાલ મરચાથી તૈયાર થયેલું ઊંધિયું ખાવાનું પસંદ કરે છે.

ઊંધિયામાં નાખવામાં આવતા મુઠિયા બનાવવાની પદ્ધતિ
મુઠિયા બે પ્રકારના બનાવવામાં આવે છે, એક બેસન (ચણા)ના લોટ અને બીજા ઘઉંના લોટમાં બનાવવામાં આવે છે.

બેસનના મુઠિયા
ચણાનો લોટ, મેથી, આખા ધાણા, મરચું, મીઠું, તેલનું મોણ, હિંગ એકરસ કરીને બનાવવામાં આવે છે.

ઘઉંના લોટના મુઠિયા
જેમાં બેસનનો ઉપયોગ કરવાને બદલે ઘઉંના લોટનો ઉપયોગ કરવામાં આવે છે. મેથી, આખા ધાણા, લીલું મરચું, તેલનું મોણ અને હિંગનો ઉપયોગ થાય છે.

ઊંધિયાના પ્રકાર

સુરતી ઊંધિયું- ભાવ પ્રતિકિલો 350-400
પાપડી, રતાળુ, રવૈયા, બટાટા, મુઠિયા નાખવામાં આવે છે. ઘણા લોકો દ્વારા કાચા કેળા પણ નાખવામાં આવે છે. શક્કરિયાનો પણ ઉપયોગ કરવામાં આવતો હોય છે.

જૈન ઊંધિયું- ભાવ પ્રતિકિલો 380-420
જૈન ઊંધિયામાં કંદમૂળનો ઉપયોગ કરવામાં આવતો નથી. માત્ર પાપડી, ચીભડા, ટીંડોળા, કાચા કેળા અને મુઠિયાનો ઉપયોગ કરવામાં આવતો હોય છે.

ફરાળી ઊંધિયું- ભાવ પ્રતિકિલો 420-440
ફરાળી ઊંધિયામાં સૂરણ રતાળુ, બટેટા, શક્કરિયા, સિંધવ મીઠું અને લીલા મરચાનો ઉપયોગ કરવામાં આવે છે. ફરાળી ઊંધિયામાં જે મુઠિયા બનાવવામાં આવે છે તે રાજગરાનો લોટ અને દૂધીના મિશ્રણથી મુઠિયા બનાવવામાં આવે છે.

ઊંધિયું ક્યારે ક્યારે ખાવામાં આવે છે?
સુરત એવું શહેર છે કે જેમાં દરેક તહેવારોને ધ્યાનમાં રાખીને અલગ જ વાનગી આરોગવામાં આવે છે જેમ કે ચંદની પડવો હોય ત્યારે સુરતમાં સ્પેશિયલ સ્વાદિષ્ટ મીઠાઈ ઘારી તૈયાર કરવામાં આવે છે. ઘારી પણ આખા વિશ્વમાં માત્ર ને માત્ર સુરત શહેરમાં જ તૈયાર થાય છે. તેવી જ રીતે દશેરાના દિવસે ફાફડા અને જલેબી ખાવાનો રિવાજ છે. ત્યારબાદ ઉત્તરાયણમાં સુરત શહેરમાં સ્પેશિયલ આરોગવામાં આવતું ઊંધિયું છે. ઉત્તરાયણના દિવસે સુરત સહિત ગુજરાતભરમાં ઊંધિયાનું વેચાણ ખૂબ મોટા પાયે થતું હોય છે. ઊંધિયું બનાવવા માટેની જે શાકભાજી હોય છે તે શિયાળાના સમય દરમિયાન ખૂબ મોટા પ્રમાણમાં મળતી હોય છે તેથી આ દિવસો દરમિયાન ઊંધિયું ખાવાનું લોકો વધુ પસંદ કરે છે. માત્ર ઉત્તરાયણના દિવસે જ નહીં પરંતુ હવે તો બારે મહિના ઊંધિયું મળે છે લોકો લગ્નસરા પણ ઊંધિયું બનાવવાનું પસંદ કરે છે. સુરતમાં ઉત્તરાયણે એક જ દિવસમાં સુરતીઓ 25થી 30 કરોડનું ઊંધિયું ઝાપટી જતા હોય છે.

ઊંધિયામાં બે પ્રકારના મુઠિયા એડ કરવામાં આવે છે.
ઊંધિયામાં બે પ્રકારના મુઠિયા એડ કરવામાં આવે છે.

ઊંધિયામાં વપરાતી કતારગામની પાપડી
સ્વાદ રસિકો તો માને છે કે ઊંધિયાનો પ્રાણ એટલે પાપડી....ઊંધિયું બનાવવા માટે જે શાકભાજી વપરાય છે તેમાં સૌથી અગત્યની અને સ્વાદને વધુ સ્વાદિષ્ટ બનાવવા માટે પાપડી સૌથી મહત્ત્વની ભૂમિકા ભજવે છે. સુરતના કતારગામની પાપડીનો સ્વાદ ઊંધયાનો સ્વાદ બમણો કરી દે છે. કતારગામની પાપડી એના દાણા અને એનું કદ ઊંધિયા માટે એકદમ બંધબેસતું હોય છે. કતારગામની પાપડીના દાણા ચપટા હોય છે. સુરત જિલ્લામાં અને ખાસ કરીને ઓલપાડ તાલુકામાં અને ઈચ્છાપોર ગામની આસપાસ જે પાપડીનો પાક આવે છે તે ઊંધિયા માટે સૌથી સ્વાદિષ્ટ પુરવાર થાય છે. આવી પાપડી તમને અન્ય કોઈ સ્થળે મળતી નથી તેના કારણે જ સુરતી ઊંધિયાનો ટેસ્ટ ખરેખર સુરતી ઊંધિયું કહેવાય છે.

સુરતી ઊંધિયા જેવો ટેસ્ટ અન્ય જગ્યાએ ન આવે
પાંચમી પેઢીથી ઊંધિયું બનાવતા નીતિન ભજિયાવાળા (ઠાકર) જણાવ્યું કે સુરતમાં વર્ષોથી તેઓ અને તેમનો પરિવાર ઊંધિયું બનાવે છે. દાયકાઓથી એક જ સરખો ટેસ્ટ તેમને ત્યાં મળે છે. તેથી સુરતીઓ અહીં ઊંધિયું ખરીદવા માટે આવતા હોય છે. સુરતની કતારગામની પાપડી તેમજ ઓલપાડ અને ઈચ્છાપોર ગામની પાપડીને કારણે સુરત જેવો જે ટેસ્ટ આવે છે તે અન્ય કોઈપણ સ્થાને ઊંધિયું બનાવો તો પણ તેનો સ્વાદ આવતો નથી. માત્ર સુરતનું ઊંધિયું સુરત પૂરતું સીમિત નથી પરંતુ આખા રાજ્ય, દેશ અને વિદેશોમાં પણ ખૂબ મોટા પ્રમાણમાં જાય છે. ઊંધિયું સુરતથી લઈ જઈને વિદેશમાં પણ લોકો આરોગે છે.

વર્ષોથી ગ્રાહકો ભજિયાવાળાનું જ ઊંધિયું લઈ રહ્યા છે.
વર્ષોથી ગ્રાહકો ભજિયાવાળાનું જ ઊંધિયું લઈ રહ્યા છે.

માત્ર ઉત્તરાયણ નહીં હવે તો બારેમાસ મળે છે ઊંધિયું
કૃણાલ જોષીએ જણાવ્યું કે ઊંધિયું બનાવવાની રેસિપી એ અમને વારસામાં મળેલી છે. અમારે ત્યાં ઊંધિયું બારેમાસ ગ્રાહકો માટે બનાવવામાં આવે છે પરંતુ સુરતીઓ ઉત્તરાયણના દિવસે ધાબે પતંગ ચગાવવા જાય છે અને તેની સાથે ઊંધિયાની લિજ્જત પણ માણે છે. તેથી સુરતમાં ઉત્તરાયણના દિવસે લોકો ઊંધિયું ખાવાનું પસંદ કરે છે. ઘણા લોકો પોતાના ઘરે જ ઊંધિયું બનાવી લેતા હોય છે પરંતુ સોસાયટીના લોકો જ્યાં મોટા પ્રમાણમાં ધાબા ઉપર એકત્રિત થતા હોય અથવા તો સોસાયટીના તમામ લોકો એકત્રિત થઈને સામૂહિક ભોજન કરતા હોય તો એવી સ્થિતિમાં અમને ખૂબ મોટા પ્રમાણમાં ઓર્ડર મળે છે અને અમારી જેમ સુરતના અનેક દુકાનદારોને ઊંધિયાના ઓર્ડર મળતા હોય છે.

અહીંનો જે સ્વાદ અમને મળે છે તે બીજે કશે મળતો નથી
ઊંધિયા ખરીદનાર ગ્રાહક જગદીશભાઈ પટેલે જણાવ્યું કે હું નવસારી બજારમાં રહું છું અને ચૌટા બજારમાં ખાસ ઊંધિયું ખરીદવા માટે આવું છું. આજે મારી ઉંમર 65 વર્ષ જેટલી થઈ ગઈ છે પરંતુ હું છેલ્લાં કેટલાંય વર્ષોથી આ જ જગ્યા ઉપર ઊંધિયું ખરીદવા માટે આવું છું. ખાસ કરીને મકરસંક્રાંતિ વખતે પણ અહીંનું જ ઊંધિયું ખાવાનું એવું નક્કી કરી લીધું છે. કારણ કે અહીંનો જે સ્વાદ અમને મળે છે તે બીજે કશે મળતો નથી અને ઊંધિયું અને પૂરી અમે ઉત્તરાયણના દિવસે અચૂક ખાઈએ છે.

ઊંધિયામાં જુદા-જુદા પ્રકારના મસાલાનો ઉપયોગ કરવામાં આવે છે.
ઊંધિયામાં જુદા-જુદા પ્રકારના મસાલાનો ઉપયોગ કરવામાં આવે છે.

કતારગામની પાપડીથી બનતા ઊંધિયાનો સ્વાદ જ અલગ
મુકેશ પસ્તાગી જણાવ્યું કે અહીં વર્ષોથી ચૌટા બજારમાં હું ઊંધિયું ખરીદવા માટે આવું છું. ઊંધિયું તો ઘણાખરા બનાવતા હોય છે પરંતુ જે કતારગામની પાપડીનો ઉપયોગ કરીને ઊંધિયું બનતું હોય છે તેનો સ્વાદ જ કંઈક અલગ છે. ઘણા એવા લોકો છે કે જેઓ સવારે સુરતથી ફ્લાઈંગ રાણીમાં બેસીને મુંબઈ જાય છે અને ઊંધિયું સાથે લેતા જાય છે. સવારે ફ્લાઈંગ રાણીમાં નીકળ્યા બાદ બપોરે લંચ સમયે ઊંધિયું ખાતા હોય છે. સુરતથી લઈને નીકળે અને પોતાના મિત્રો સાથે મુંબઈમાં ઊંધિયું ખાવાનો છું. એવા અનેક કિસ્સાઓને અનેક લોકો છે એના કારણે જ મુંબઈનો પણ એક ખૂબ મોટો વર્ગ છે કે જે ઊંધિયું ખાવા માટે તલપાપડ પણ હોય છે. સુરતીઓ તો ઉત્તરાયણના દિવસે ખૂબ મોટા પ્રમાણમાં ઊંધિયું આરોગતા હોય છે.

ઉત્તરાયણના દિવસે કેટલું ઊંધિયું ખવાશે
એક અંદાજ મુજબ સુરત શહેરમાં ઉત્તરાયણના એક જ દિવસે 7,50,000 હજાર કિલો કરતાં પણ વધુનું ઊંધિયું સુરતીઓ ઝાપટી જાય છે. સુરતીઓ માત્ર એક જ દિવસમાં 25થી 30 કરોડ રૂપિયાનું ઊંધિયું ખાઈ જશે. ગત વર્ષે 60થી 70 હજાર કિલો ઊંધિયું સુરતીઓ દ્વારા આરોગવામાં આવ્યું હતું. જ્યારે 2021માં 50 હજાર કિલોથી વધુ ઊંધિયું સુરતીઓ ઝાપટી ગયા હતા.

બાફી અને તળી એમ બે પ્રકારે ઊંધિયું બનાવવામાં આવે છે.
બાફી અને તળી એમ બે પ્રકારે ઊંધિયું બનાવવામાં આવે છે.

ઊંધિયાના રસપ્રદ કિસ્સાઓ
રિદ્ધેશ ભજિયાવાળાએ જણાવ્યું કે અમારી આ પાંચમી પેઢી છે જે ઊંધિયું બનાવે છે અત્યાર સુધીના એવા અનેક કિસ્સાઓ છે કે જે ખરેખર આશ્ચર્ય પમાડે તેવા છે. સુરતી ઊંધિયું અને તેના સ્વાદને લઈને અનેક પાસાઓની આપણે ચર્ચા કરી શકીએ છીએ અને વિગતવાર કરી શકે છે પણ મારા મતે સુરતી ઊંધિયું એટલા માટે છે કે અહીંના પાણીની તાસીર જ કંઈક અલગ છે.

સુરતથી મોકલેલું ઉંધિયું દાઢે વળગ્યું
વર્ષો પહેલાંનો એક યાદગાર કિસ્સો છે કે સુરત નજીક બારડોલીમાં જાની દાદા કરીને હતા જેમની સાથે અમારે ખૂબ જ કૌટુંબિક સંબંધો જેવા હતા. તેમને બે દીકરી હતી અને બંને દીકરીનાં લગ્નમાં તેમણે મેનુમાં ઊંધિયું અચૂક રાખ્યું હતું. એક વખતે દીકરીનાં લગ્નમાં અમે સુરતથી ઊંધિયું તેમના ઓર્ડર મુજબ બનાવીને મોકલી આપ્યું હતું. જે લગ્નમાં હાજર તમામ લોકોને ખૂબ જ સ્વાદિષ્ટ લાગ્યું હતું અને તેના લોકોએ ભરપેટ વખાણ જાની દાદા આગળ કર્યા હતા. જેને કારણે જાની દાદાનો એવો આગ્રહ હતો કે હવે મારી બીજી દીકરીનાં લગ્ન છે ત્યારે તમે ઊંધિયું સુરતથી બનાવીને મોકલો એને બદલે બારડોલી આવીને બનાવો.

કતારગામની પાપડીવાળું ઊંધિયું સૌ કોઈને દાઢે વળગ્યું છે.
કતારગામની પાપડીવાળું ઊંધિયું સૌ કોઈને દાઢે વળગ્યું છે.

સુરતનું પાણી ન હોવાથી ટેસ્ટ જ ન આવ્યો
અમે તેમને સમજાવ્યા કે અમે અહીંથી જ બનાવીને મોકલી આપીશું પરંતુ તેમની ખૂબ જીદ હતી માટે અમે તેમનું માન રાખવા માટે આખરે ના પાડી શક્યા નહીં અને જે અમારો ઊંધિયું બનાવનાર કારીગર હતો તેને અહીંથી જ તમામ પ્રકારના મસાલા અને શાકભાજી લઈને બારડોલી ખાતે લગ્નમાૂં ઊંધિયું બનાવવા માટે મોકલ્યો હતો. પરંતુ એનો ટેસ્ટ સારો ન હતો અને તમામ લોકોએ કહ્યું હતું કે આ વખતના ઊંધિયાનો ટેસ્ટ સારો નથી. જાની દાદાએ અમને કોલ કરીને કહ્યું કે આ વખતે મજા ન આવી ત્યારે અમે કહ્યું કે દાદા એટલે જ અમે કહેતા હતા કે અમે સુરતથી જ ઊંધિયું બનાવીને મોકલીએ. કારણ કે બધી વસ્તુ તો અમે અહીંથી લઈને આવ્યા હતા પરંતુ પાણી લઈને નહોતા આવ્યા અને સુરતના પાણીની જ એ તાસીર છે કે ઊંધિયાને સાચો ટેસ્ટ આપી શકે છે.

મુંબઈના IPS તો સ્પેશિયલ મગાવતા
મુંબઈના એક આઇપીએસ અધિકારી જેઓ સમયાંતરે સુરતનું ઊંધિયું ખાવાનો આગ્રહ રાખતા હતા. પરંતુ આશ્ચર્યની વાત એ છે કે ઊંધિયામાં નાખવામાં આવતી પાપડી અને રતાળુએ મોટેભાગે લોકોને ખૂબ ભાવે છે પરંતુ આ આઇપીએસ અધિકારીને બેસન અને મેથીના બનાવેલા મુઠિયા ખૂબ જ ભાવતા હતા. તેઓ હંમેશાં ફોન કરીને કહેતા હતા કે જ્યારે પણ તું ઊંધિયું મોકલે ત્યારે તેમાં મુઠિયા વધારાના નાખીને મોકલજે. કારણ કે મને સૌથી વધુ એનો સ્વાદ ભાવે છે અને હું એમને હંમેશાં ઊંધિયાની સાથે અલગથી થોડા મુઠિયા મોકલતો હતો અને તેઓ ખૂબ રાજી થતા હતા. તેઓ કહેતા હતા કે ઊંધિયું ખવાય ગયા પછી તારા જે મુઠિયા બનાવીને મોકલેલા હોય છે તેને અલગથી બનાવીને પણ ખાવ છું.

ઉત્તરાયણના દિવસે ઊંધિયું લેવા લાઈનો લાગે છે.
ઉત્તરાયણના દિવસે ઊંધિયું લેવા લાઈનો લાગે છે.

એક ગ્રાહક તો માત્ર પાપડીવાળું જ ઊંધિયું માગે
એક અમારા ગ્રાહક હતા જેઓ જ્યારે પણ ઊંધિયું લેવા માટે દુકાને આવતા ત્યારે તેઓ આગ્રહપૂર્વક કહેતા હતા કે ભાઈ ઊંધિયું આપે ને તો સૌથી વધારે પાપડી જ આપજે. કારણ કે પાપડી મને ઊંધિયામાં સૌથી વધારે ભાવે છે. ત્યારે અમે મજાકમાં કહેતા કે કાકા ખાલી પાપડી જ ખાવી છે તો પછી તમારા ઘરે બનાવીને જ કેમ ખાતા નથી. ત્યારે કાકા હસતા મોઢે જવાબ આપે કે ભાઈ પાપડી સાથે તારા બાકીની શાક અને મુઠિયાનો જે અર્ક ઊતરે છે તે મારા ઘરે એકલું પાપડીનું શાક બનાવને તેમાં ના ઊતરી શકે એટલે તારા ત્યાંથી ઊંધિયું લઉં છું અને પાપડી જ માંગું છું અને તેની સાથે તારો જ રસો આવે છે. તેમાં એ તમામ શાકભાજીનો અર્ક ઊતરેલો હોય છે એટલે એનો સ્વાદ બીજે કશે મળી શકે એમ નથી અને મારા ઘરે પણ એ મળી શકે એમ નથી.

અન્ય સમાચારો પણ છે...