ભ્રષ્ટાચારનો ભરડો:35 હજારનો પગારદાર મહાદેવ દોઢ કરોડના બંગલાનો માલિક નીકળ્યો, લીફ્ટ પણ હતી

જાણે મોટી સિધ્ધિ પ્રાપ્ત કરી હોય તેમ હસતો દેખાતો આ ફોટો એસીબીના લાંચ કેસમાં પકડાયેલાે એએસઆઈ મહાદેવ કિશનરાવ સેવઇકરનો છે. ઓઇલના વેપારી પાસેથી 4.50 લાખની રકમ લાંચ પ્રકરણમાં એસીબીના છટકામાં જમાદાર મહાદેવ પકડાયો પછી પણ તેના મોઢા પર કોઈ જાતનો અફસોસ દેખાતો ન હતો ઉલ્ટાનું તે બિન્ધાસ્ત હોય એવું ફોટા પરથી દેખાય આવે છે.

મહાદેવ સેવઇકર 1988માં પોલીસમાં કોન્સ્ટેબલ તરીકે જોઇન્ટ થયો ત્યારે પગાર 800 થી 900 રૂપિયા માસિક હતો પછી હેડ કોન્સ્ટેબલ અને હાલમાં એએસઆઈ બની ગયો છે. આજે તેનો પગાર 35 હજાર છે. તેની ઉંમર 55 વર્ષની છે અને રિટાયર થવાના 3 વર્ષ બાકી છે. લાંચિયો એએસઆઈ મહાદેવ કિશનરાવ પાંડેસરામાં પિયુષ પોઇન્ટ પાસે કર્મયોગી સોસાયટીમાં બે પ્લોટ ભેગા કરી 3 માળના આલિશાન બંગલામાં રહે છે.

બંગલામાં લીફટ પણ છે. બંગલાની વેલ્યૂ ગણવામાં આવે તો આશરે દોઢ કરોડની આસપાસ છે. 32 વર્ષની નોકરીમાં મોટેભાગે તેણે આર.આર.સેલ અને અન્ય મલાઇદાર બ્રાંચોમાં નોકરી કરી છે. હાલમાં રેન્જ ઓપરેશન ગૃપમાં સુરત જિલ્લામાં ફરજ બજાવે અને મૂળ નોકરી તેની પોલીસ હેડકવાર્ટર ઘલુડી છે. હજુ લાંચમાં સુરત જિલ્લા એલસીબીનો હેડ.કો.દિપેશ હસમુખ મૈસુરીયા ભાગી ગયો છે.

મહાદેવના 3થી 4 ફોનની કોલ ડિટેઇલથી મોટા ભોપાળા ખુલશે
મહાદેવ કિશનરાવ સેવઇકર 3 થી 4 મોબાઇલ રાખે છે. તે મોબાઇલ નંબરો ખરેખર તેના નામે છે કે કેમ અને કોલ ડિટેઇલ્સની જો તપાસ કરવામાં આવે તો ઘણા ભોપાળા બહાર આવી શકે છે. હજુ તેણે પરિવારના નામે મિલકતો લીધી હોવાની આશંકા છે. એસીબી આ લાંચ કેસમાં ઉંડાણપૂર્વક તપાસ કરે તો ઘણી હકીકતો બહાર આવી શકે છે.

મહાદેવ અને દિપેશના ઘરે મોડી રાત સુધી સર્ચ ચાલ્યું
​​​​​​​પાંડેસરા કર્મયોગી સોસાયટીમાં એએસઆઈ મહાદેવ સેવઇકર, પાલનપુર ન્યુ કેનાલ રોડ પર રાજહંસ પ્લેટીનમમાં હેડ.કો. દિપેશ હસમુખ મૈસુરીયા અને ખોલવડ ગામે પંચામૃત સોસાયટીમાં વચેટિયો વિપુલ અશોક બલર રહે છે. આ ત્રણેયના ઘરે એસીબીની ટીમે શુકવારે સવારે સર્ચ કર્યુ હતું. જેમાં વિપુલની ઓફિસમાંથી 2 લાખની રોકડ મળી હતી, મહાદેવની સ્કોર્પિયો ગાડી કબજે કરી છે. લાંચિયા મહાદેવ અને દિપેશના ઘરે મોડીરાત સુધી સર્ચ ચાલ્યું હતું. મહાદેવના બંગલામાં ઘણી કિંમતી વસ્તુઓ જોવા મળી જે જોઇને સ્ટાફ પણ ચોંકી ગયા હતા.