છેતરપિંડી:જીયાંસ ઍક્ષપોર્ટનું રૂ. 53.73 લાખની ફૂલેકું

સાયણના કારખાનેદાર પાસેથી ઉધારીમાં રૂ.53.73 લાખની કિંમતનું કાપડ ખરીદ્યા તેના નાણાં નહીં ચૂકવી દુકાન બંધ કરી નાસી છુટેલા રિંગરોડ સ્થિત યુનિવર્સલ ટેક્ષટાઇલ માર્કેટમાં આવેલી જીયાંસ એક્ષપોર્ટના બે ભાગીદારો અને કાપડ દલાલ સહિત 4 વિરૂદ્ધ સલાબતપુરા પોલીસમાં ફરિયાદ નોંધાઇ છે.કતારગામ ઓમ હેરિટેજમાં રહેતા ચિરાગ હરખજીભાઇ સેટા સાયણ સનરાઇઝ ઇન્ડ. એસ્ટેટમાં અમીરા ફેબ્રિક્સના નામે કાપડનું કારખાનું ધરાવે છે. વર્ષ 2019માં તેમનો સંપર્ક ભીખા માવજી વધાસીયા સાથે થયો હતો.

મનોજ નાનજી ગજેરા અને પિયુશ રામજી મીયાણી (રહે, વિનાયક સોસાયટી, નાના વરાછા)ભાગીદારીમાં રિંગરોડ યુનિવર્સલ ટેક્ષટાઇલ માર્કેટમાં શ્રીજી ટેક્ષટાઇલ, ખોડીયાર ટેક્ષટાઇલ, શિવ ટેક્ષટાઇલ તથા જીયાંસ એક્ષપોર્ટના નામે ધંધો કરે છે. શરૂઆતમાં આ ટોળકીએ ઉધારીમાં લીધેલા કાપડના પૈસા ચૂકવી આપ્યા બાદ ગત વર્ષમાં રૂ.1,49,827નું કાપડ ખરીદી તેના નાણાં ચૂકવ્યા ન હતા.

આ ઉપરાંત અન્ય વેપારી કમલેશ ઠુમ્મરના આકાશ ટેક્ષ, રૂબી ટેક્ષ, કાલીકા ટેક્ષ, બેસ્ટ ટેક્ષ, કોમલ સિન્થેટીક્સ, શ્રીહરીઓમ ટેક્ષ તથા મહાકાલી ટેક્ષના ફર્મમાંથી રૂ.52,23,487નું કાપડ ઉધારીમાં ખરીદી તેના નાણા પણ નહીં ચૂકવી કુલ રૂ.53,73,313ની ઠગાઇ કરી દુકાન બંધ કરી નાસી ગયા હતા.