તસ્કરી:સુરતમાં મતગણતરી સ્થળ પર ખિસ્સા કાતરુઓએ મચાવેલો આતંક, ગાંધી એન્જિ. કોલેજ પર પિક-પોકેટિંગની ઘટનાઓ

સુરત મહાનગરપાલિકાની ચૂંટણીની મતગણતરી ચાલી રહી છે. મતગણતરી સ્થળ પર લોકોની ભારે ભીડ ઉમટી છે. રાજકીય પાર્ટીઓના કાર્યકર્તા અને મીડિયા સહિતના લોકોના પર્સ ખીસ્સાકાતરૂંએ ચોરી લીધા હતાં. ભારે ભીડ વચ્ચે ચારેક મીડિયાકર્મીના પર્સ ચોરાઈ જતાં સ્થળ પર હાજર પોલીસને જાણ કરવામાં આવી હતી. જો કે ભીડમાં ગાયબ થઈ ગયેલા પોકેટમારો સામે પોલીસે પણ કાર્યવાહી કરવાની લાચારી દર્શાવી હતી.

ઈન્ટવ્યૂ લેતા મીડિયા કર્મીને શિકાર બનાવાયાં
મજૂરાગેટ પર આવેલા મતગણતરી સ્થળ ગાંધી એન્જિનિયરીંગ કોલેજ બહાર સવારથી પાલિકાની ચૂંટણીના પરિણામને લઈને લોકો અને રાજકીય પાર્ટીઓના કાર્યકર્તાઓની ભીડ એકઠી થઈ હતી. આ ભીડ અને મતગણતરીનું રિપોર્ટીંગ કરતાં મીડિયાકર્મીઓ કવરેજ કરી રહ્યાં હતાં, તે દરમિયાન ઈન્ટર્વ્યૂ લેતી વખતે મીડિયા કર્મીઓના ખીસ્સા તસ્કરોએ કાપ્યા હતાં. ચાર મીડિયા કર્મીઓ સહિતના લોકોના પર્સની ચોરી તસ્કરોએ કરી હતી.

પોલીસ લાચારની જેમ તમાશો જોતી રહી
ગાંધી એન્જિનિયરીંગ કોલેજ બહાર લોકો અને મીડિયાકર્મીઓના પર્સ ચોરાઈ ગયા હતાં. જેથી તમામે બંદોબસ્તમાં ગોઠવાયેલી પોલીસને જાણ કરી હતી.જો કે, પોલીસ બંદોબસ્તની જગ્યાએ મસ્ત હોય તે રીતે લાચારી દર્શાવી હતી. તથા પોલીસ ફરિયાદ કરવા માટે સૂચના આપી હતી. ભીડમાં ચોરી કરીને ઓગળી ગયેલા તસ્કરો અંગે આસપાસના સીસીટીવી તપાસવામાં આવે તો પોકેટમાર ગેંગ ઝડપાઈ જાય તેવી શક્યતા છે.