સુરત:હીરાબાગ નજીક ધરતીનગરમાં પરપ્રાંતિય શ્રમિકો ફરી રસ્તા પર ઉતરતાં પોલીસે મામલો થાળે પાડ્યો

કોરોના વાઈરસથી ચાલતા ત્રીજા તબક્કાના લોકડાઉનમાં શ્રમિકોની ધીરજનો અંત આવી ચુક્યો છે. એક રોડ પર આવેલા ધરતીનગર પર શ્રમિકો આજે ફરી રસ્તા પર ઉતરી આવ્યાં હતાં. પરપ્રાંતિય શ્રમિકોએ વતન જવાની માંગ કરવાની સાથે સાથે ભોજન ન મળતું હોવાની ફરિયાદ કરી હતી. જેથી ઘટના સ્થળે પહોંચેલા પોલીસ કાફલાએ સમજાવટથી કામ લઈને આશ્વાસન આપતાં મામલો થાળે પડ્યો હતો.

લાચાર બન્યા છીએ-પરપ્રાંતિય

વિનોદ નામના પરપ્રાંતિય શ્રમિકે જણાવ્યું હતું કે, છેલ્લા દોઢ મહિના કરતાં વધુ સમયથી કામ વગર બેઠા છીએ. રૂપિયા નથી અને વતન જવું છે. અહિં જમવાનું મળવાનું હવે મુશ્કેલ બન્યું છે. અમારે આ બીજી વખત રસ્તા પર ઉતરવાની ફરજ પડી છે. તંત્ર ધ્યાન આપે તે જરૂરી છે. પોલીસે આ તમામ લોકો સાથે સમજાવટથી કામ લેતા મામલો વણસે તે અગાઉ જ શ્રમિકોને તેમના ઘરે પરત મોકલી આપવામાં આવ્યાં હતાં.