• Gujarati News
  • Local
  • Gujarat
  • Surat
  • After Making Friends On Social Media, The Young Woman Made A Nasty Video, Blackmailed And Suicide Computer Operator In Surat

ચેતવણીરૂપ કિસ્સો:સોશિયલ મીડિયા પર મિત્રતા કરી યુવતીએ બીભત્સ વીડિયો બનાવ્યો, બ્લેકમેઇલ કરી રૂપિયા પડાવતાં સુરતમાં કમ્પ્યુટર ઓપરેટરે ગળાફાંસો ખાધો

સુરત13 દિવસ પહેલા
આપઘાત કરનાર યુવકની ફાઈલ તસવીર.
  • પરિવારે મૃતકનો મોબાઇલ ચેક કરતાં ખબર પડી કે યુવતીએ સોશિયલ મીડિયા પર મિત્રતા કેળવી યુવકને ફસાવ્યો હતો
  • યુવતીએ બ્લેકમેઇલિંગ કરતાં અગાઉ પણ યુવકે ફોન કરી આપઘાત કરવાની ચીમકી આપી હતી

સુરતમાં રાંદેરના ઉગત-ભેંસાણ રોડ પર રહેતા કમ્પ્યુટર ઓપરેટર સાથે સોશિયલ મીડિયા પર મિત્રતા કર્યા બાદ તેનો બીભત્સ વીડિયો બનાવી યુવતીએ બ્લેકમેઇલ કર્યો હતો. મૃતકનો મોબાઇલ ચેક કરતાં ખબર પડી કે 20 હજાર રૂપિયા ખંખેર્યા બાદ વધુ રૂપિયા માગી યુવતીએ સતત બ્લેકમેઇલ કરતાં યુવકે ગળાફાંસો ખાઇ આત્મહત્યા કરી હતી. યુવકની આત્મહત્યા મામલે સાયબર ક્રાઇમે યુવતી સહિત બેને પકડી પાડ્યા હતા. આ મામલે રાંદેર પોલીસે આત્મહત્યાનો દુષ્પ્રેરણાનો ગુનો દાખલ કર્યો હતો.

યુવકે 31મી ઓક્ટોબરે ઘરમાં ફાંસો ખાધો હતો
મૂળ ઓલપાડનો અને ઉગત-ભેંસાણ રોડ પર રહેતા તેમજ ઓનલાઇન શોપિંગની ઓફિસમાં કમ્પ્યુટર ઓપરેટર તરીકે નોકરી કરતા 26 વર્ષીય યુવકે 31મી ઓક્ટોબરે મોડી રાતે ઘરમાં ફાંસો ખાઈ આપઘાત કરી લીધો હતો. જ્યારે પરિવારને સભ્યોએ મૃતકનો મોબાઇલ ચેક કરતા તેમાંથી ચોંકાવનારી હકીકતો જાણવા મળી હતી. જેમાં યુવક સાથે યુવતીએ સોશિયલ મીડિયા પર બીભત્સ વાતચીત કરી ફસાવ્યો હતો.

યુવકના આપઘાત બાદ તેનો મોબાઈલ ચેક કરતા ખુલાસો થયો.
યુવકના આપઘાત બાદ તેનો મોબાઈલ ચેક કરતા ખુલાસો થયો.

સતત બ્લેકમેલ કરતા યુવકે ત્રાસી જઇ ફાંસો ખાધો
યુવતીએ યુવકનો બીભત્સ વીડિયો બનાવી તેને સોશિયલ મીડિયા પર તેના સંબંધી અને મિત્રોને મોકલવાની ધમકી આપી બ્લેકમેલ કરી રૂપિયા પડાવ્યા હતા. વધુ રૂપિયા માટે સતત બ્લેકમેલ કરતા યુવકે ત્રાસી જઇ ફાંસો ખાધો હતો. જોકે, વીડિયો ડિલીટ કરવા માટે યુવકે વીડિયો કોલ કરીને પોતે યુવતીને આપઘાત કરવાની પણ ચીમકી આપી છતાં તેણે વધુ રૂપિયાની માગણી ચાલુ જ રાખી હતી.

રાંદેર પોલીસે આત્મહત્યાનો દુષ્પ્રેરણાનો ગુનો દાખલ કર્યો હતો.
રાંદેર પોલીસે આત્મહત્યાનો દુષ્પ્રેરણાનો ગુનો દાખલ કર્યો હતો.

20 હજાર લીધા બાદ વધુ રૂપિયાની માંગણી કરી
સમાજમાં બદનામીના ડરે યુવકે 31મી ઓક્ટોબરે મધરાત્રે 2.18 વાગ્યે પેટીએમથી 5 હજાર, 2.26 વાગ્યે બીજા 5 હજાર તેમજ 2.29 વાગ્યે 10 હજારની રકમ મળી કુલ 20 હજારની રકમ યુવતીને મોકલી આપી હતી છતાં યુવતી તેની પાસે વીડિયો ડિલિટ કરવા માટે વધુ 5 હજારની માંગણી કરી હતી. યુવક પાસે રૂપિયાની વ્યવસ્થા ન થતાં યુવતી તેની પાસે વારંવાર માંગણી કરી માનસિક ત્રાસ આપી રહી હતી.