ગુજસીટોક:સજ્જુ કોઠારી સહિત 8 સામે ગુનો દાખલ; 5 ની રાતોરાત ધરપકડ, 3 વોન્ડેટ જાહેર

ગુજસીટોક કાયદા હેઠળ વધુ એક ગુનો નાનપુરાના માથાભારે સજજુ કોઠારી સહિત 8ની સામે અઠવાલાઇન્સ પોલીસમાં દાખલ થયો છે. સજજુ કોઠારીની ગેંગના તેના ભાઈ મોહંમદ યુનુસ કોઠારી, જાવીદ ગુલામ મલેક, મોહંમદ આરીફ શેખ, આરીફ શેખ અને મોહંમદ કાસીમ અલીને પોલીસ મોડીરાતે ઊંચકી લાવી હતી.

પાંચેયનો કોરોનાનો રિપોર્ટ આવ્યા પછી ધરપકડની કાર્યવાહી કરાશે. જ્યારે માથાભારે સજજુ કોઠારી ઘરે મળી આવ્યો ન હતો. હાલમાં સજજુ સહિત 3 ફરાર છે. માથાભારે સજજુ કોઠારી સામે 6, તેના ભાઈ મોહંમદ યુનુસ કોઠારી સામે 2, સમીર શેખ-3, મોહંમદ કાસીમ-2, જાવીદ ગુલામ-2, આરીફ શેખ-3, મોહંમદ આરીફ-2, હસનૈન કોકાવાલા-2 ગંભીર ગુના નોંધાયેલા છે. સજજુ કોઠારી સામે 15 ગુના નોંધાયેલા છે અને પાસા-તડીપાર સહિતની પણ અગાઉ કાર્યવાહી થઈ હતી. વર્ષ 2018માં સજજુ કોઠારીએ અઠવા પોલીસના બે પોલીસને પર માર માર્યો હતો.

સજ્જુના સાગરિતો

અઠવા પોલીસની બહાર બંદોબસ્ત ગોઠવાયો
સજજુ કોઠારીના 5 સાગરિતોને ઊંચકી લાવતા લોકોના ટોળા પોલીસ સ્ટેશને જમા થયા હતા. જેના કારણે અઠવા પોલીસની બહાર બંદોબસ્ત ગોઠવી દેવામાં આવ્યો છે. ભૂતકાળમાં માથાભારે સજજુ કોઠારીને પોલીસ પકડી લાવી હતી ત્યારે પણ મહિલાઓના ટોળા પોલીસ સ્ટેશનની બહાર જમા થયા હતા.