સુરત ગ્રીષ્મા હત્યા કેસ:જાહેરમાં ગળું કાપી હત્યા કરનાર દોષિત જાહેર થયેલા ફેનિલને કોર્ટ 5મી મેના રોજ સંભવતઃ સજા સંભળાવાશે

સુરત2 મહિનો પહેલા
ફેનિલને દોષિત જાહેર કરાયા બાદ હવે 5મી મેના રોજ સજા સંભળાવવામાં આવશે - Divya Bhaskar
ફેનિલને દોષિત જાહેર કરાયા બાદ હવે 5મી મેના રોજ સજા સંભળાવવામાં આવશે
  • આ રેરેસ્ટ ઓફ રેર કેસ નથી, આરોપીનું ભવિષ્ય જોઈને ઓછામાં ઓછી સજા કરોઃ બચાવ પક્ષ
  • આરોપી ક્રિમિનલ માનસિકતા ધરાવતો અને ગણતરીપૂર્વકની હત્યા કરીઃ સરકાર પક્ષ

સુરતના પાસોદરામાં 12 ફેબ્રુઆરીએ સરાજાહેર કરાયેલી ગ્રીષ્મા વેકરિયાની હત્યાના કેસમાં આરોપી ફેનિલ ગોયાણીને કોર્ટે તકસીરવાર ઠેરવ્યો હતો. ગત 22મી એપ્રિલના રોજ આખો દિવસ સજા પર દલીલો થઈ હતી, પહેલાં બચાવ પક્ષે દલીલ કરી હતી. ત્યારબાદ સરકાર પક્ષે દલીલ કરી હતી. ત્યારબાદ ફરી બચાવ પક્ષની દલીલો થઈ હતી. સરકાર પક્ષે કહ્યું હતું કે, વેબસિરિઝ જોઈને હત્યા કરી છે. ત્યારે સામે પક્ષે દલીલ કરતાં જણાવ્યું હતું કે, વેબસિરીઝ જોતો એટલે લટકાવી દશો? બંને પક્ષોની દલીલો બાદ જજે તારીખ 26 એપ્રિલ આપી હતી. જેથી આજે કોર્ટ દ્વારા સજાની તારીખ જાહેર કરાઈ છે. જે પ્રમાણે સંભવતઃ 5મી મેના રોજ સજાનો ચુકાદો જાહેર કરવામાં આવશે.મહત્વપૂર્ણ છે કે આજે સરકારી વકીલ કોર્ટમાં હાજર રહ્યા નહોતા. સાથે જ ફેનિલને પણ કોર્ટમાં હાજર કરાયો નહોતો.

સરકારી વકીલ દ્વારા કેપિટલ પનિશમેન્ટની સજાની માગ કરાઈ છે
સરકારી વકીલ દ્વારા કેપિટલ પનિશમેન્ટની સજાની માગ કરાઈ છે

સરકાર પક્ષની દલીલો
ગત 22મીએ આખો દિવસ દલીલો ચાલી હતી. જેમાં સરકારી વકીલે દલીલ કરતાં કહ્યું કે, અમારો કેસ માત્ર વીડિયો પર આધારિત નથી. આરોપી ક્રિમિનલ માનસિકતા ધરાવતો હતો અને ગણતરીપૂર્વકની તેણે હત્યા કરી છે. આરોપી ચપ્પુ ખરીદવા માટે ઓનલાઇન ફ્લિપકાર્ટ દ્વારા ઓર્ડર આપ્યો હતો. ઓર્ડર કેન્સલ થયા બાદ તેણે મોલમાંથી ચપ્પુ ખરીદ્યું હતું અને બીજું ચપ્પુ તેના મિત્ર પાસેથી ખરીદ્યું હતું. આરોપીએ હત્યા કરવા પહેલા રેકી પણ કરી હતી. ગુનાના દિવસે તે ગ્રીષ્માની કોલેજમાં તેને શોધવા ગયો હતો. ગ્રીષ્માની મિત્ર ધૃતિને તેણે કહ્યું હતું કે આજે ગ્રીષ્માના ઘરે જઈને કંઈક મોટું કરવાનો છું અને ત્યાર પછી તેણે કહ્યું કે ના હોય તો વાત કરવા જવાનો છું. બનાવ પહેલાં ક્રિષ્ના સાથે તેણે ઇન્સ્ટાગ્રામ પર વાત કરી હતી, જેમાં પણ તેની હત્યા કરવાનો હોય એવું માલૂમ પડે છે. દરેક વાલિયો વાલ્મીકિ બની શકતો નથી. ભય વિના પ્રિત ન થાય. આરોપીને સખતમાં સખત સજા કરવામાં આવે છે. માત્ર ગ્રીષ્માની જ હત્યા નહીં, કાકા અને ભાઈ ધ્રુવની પણ હત્યાનો પ્રયાસ કર્યો હતો.

કોર્ટમાં દલીલો પૂર્ણ થતાં હવે સજા સંભળાવવામાં આવશે
કોર્ટમાં દલીલો પૂર્ણ થતાં હવે સજા સંભળાવવામાં આવશે

બચાવ પક્ષની દલીલો
બચાવ પક્ષે જણાવ્યું હતું કે, લાડુ માગતો એટલે લટકાવી દો, વેબસિરીઝ જોતો એટલે લટકાવી દો. આવી લાંબી દલીલ કરીને વધુ માર્ક્સ મેળવવાનો પ્રયાસ કરાયો છે. જેને ચાલવાનું ભાન ન હોય તે લાડું કેવીરીતે માગે અને ઇનોવા ચોરીમાં ક્યાં એ આરોપી પુરવાર થયો છે. એને પસ્તાવો નથી એવું કહેવામાં આવ્યું એ કોની સામે પસ્તાવો વ્યક્ત કરે. એને પસ્તાવો નથી એવું કેવી રીતે માની લીધું. છરીના ઘામાં સહાનુભૂતિ નથી મેળવી જે ઘા માર્યા તેમાં નસો કપાઈ ગઈ હતી. લિમિટ બહારનું રિપ્રેઝન્ટ કરવામાં આવ્યું છે. આને જો સજા નહીં થાય તો સમાજમાં કોઈ સ્ત્રી સુરક્ષિત રહેશે નહી? કેવી રીતે કહેવામાં આવ્યું. કાયદા કડક કરવાનાં સજા વધારવાના આ ફક્ત પોલિટિક્સ કમ્પઝેશન છે. જ્યાં કેપિટલ પનિસમેન્ટ છે ત્યાં ગુનાખોરી ઘટી જતી નથી. વાલિયો વાલ્મીકિ બનશે તેવું તો એને છૂટો મુકો તો જ ખબર પડશે. આ કોઈ ઓર્ગેનાઈઝ્ડ ક્રાઇમ નથી. ક્રિમિનલોની સંગતમાં ફરતો હોય એવો આ છોકરો નથી. હું બે હાથ જોડીને કહું છું કે ઓછામાં ઓછી સજા કરો. આ કંઈ બહાર આવીને ખૂંખાર આરોપી બની જવાનો નથી.

ફેનિલે કાવતરું ઘડીને હત્યા કરી હતી.
ફેનિલે કાવતરું ઘડીને હત્યા કરી હતી.

પુરાવારૂપે વીડિયોએ સૌથી મહત્વનો ભાગ ભજવ્યો
સત્ર ન્યાયાધીશ વિમલ કે. વ્યાસની કોર્ટમાં ચાલી રહેલા ગ્રીષ્મા હત્યા કેસમાં પુરાવારૂપે વીડિયોએ સૌથી મહત્વનો ભાગ ભજવ્યો હોવાનું બહાર આવ્યું હતું. ગ્રીષ્માની હત્યા સમયનો જે વીડિયો જોઇને લોકો કહેતા હતા કે કોઈ બચાવવા કેમ ન આવ્યું, એ વીડિયો જ આરોપી માટે ગાળિયારૂપ સાબિત થઈ ગયો છે.

ફેનિલે ગ્રીષ્માના ઘરે જઈને હત્યા કરી હતી
ફેનિલે ગ્રીષ્માના ઘરે જઈને હત્યા કરી હતી

ઘટના શું હતી?
સુરતમાં કામરેજના પાસોદરામાં ગત 12 ફેબ્રુઆરીના રોજ ગ્રીષ્મા વેકરિયાની એકતરફી પ્રેમમાં પાગલ ફેનિલ ગોયાણીએ ગળું કાપી ઘાતકી હત્યા કરી હતી. ત્યાર બાદ હાથની નસ કાપીને ઝેરી દવા પીવાનું નાટક કરી આપઘાતનો પ્રયાસ કર્યો હતો. ગ્રીષ્માની હત્યા કરનારા આરોપી ફેનિલને હોસ્પિટલમાંથી રજા મળતાં પોલીસે કોર્ટમાં રજૂ કરી રિમાન્ડ મેળવ્યા હતા. રિમાન્ડ પૂર્ણ થતાં જ્યુડિશિયલ કસ્ટડીમાં ખસેડાયો હતો. હાલ ફેનિલ લાજપોર જેલમાં બંધ છે.ત્યારે આગામી 5મીના રોજ શું સજા ફેનિલને મળશે તેના પર સૌ કોઈની નજર છે.