પરિણામ:ચેમ્બરમાં ચૂંટણી: 25મી માર્ચે મતદાન અને રાત્રે જ પરિણામ, મેનેજિંગ કમિટીની ચૂંટણીથી ગરમાટો

ચેમ્બર ઓફ કોમર્સમાં મેનેજિંગ કમિટીની ચૂંટણી 25મી માર્ચે છે. ચૂંટણીના પડઘમને લઈ ચેમ્બરના સભ્યો સક્રિય થયા છે. ફોર્મ ભરવાની છેલ્લી તા. 25 ફેબ્રુ.છે. આ વર્ષે 1 ગોલ્ડ મેમ્બર, પ્લેટિનમમાં 3 મેમ્બર, પેટર્નમાં 6 મેમ્બર, ચીફ પેટર્નમાં 12 મેમ્બર, રીજયોનલમાં અને લાઈફમાં 46 મેમ્બરો વચ્ચે ચૂંટણીની શક્યતા છે.

ચૂંટણી કમિટીમાં કેતન પટેલ, હેતલ મહેતા, પીએમ શાહ, સીએમ જરીવાલા અને મહેન્દ્ર કતારગામ વાલા ચૂંટણી પ્રક્રિયા કરશે. ગત વર્ષે મેનેજિંગ કમિટીના મેમ્બર ન બની શકેલા ચેમ્બરના સભ્યો ચૂંટણીની તારીખ જાહેર થતાની સાથે જ જીતવા સક્રિય થઈ કમર કસી રહ્યા છે. આ વર્ષે સતત બીજા વર્ષે ચૂંટણીની સંભાવના છે. ચેમ્બરની મેનેજિંગ કમિટીની ચૂંટણીનું સમયપત્રક જાહેર કરાયું છે. 12મી માર્ચ સુધી દાવેદારી ફોર્મ પરત ખેંચી શકશે. ચૂંટણી કમિટી 13 માર્ચે ઉમેદવારોની અંતિમ યાદી જાહેર કરશે અને 25મી માર્ચના રોજ સરસાણાના ટ્રેડ એન્ડ કન્વેન્શન સેન્ટર ખાતે મતદાન પ્રક્રિયા સવારે 9થી સાંજે 5 સુધી યોજાશે. અને રાત્રે પરિણામ જાહેર કરવામાં આવશે.