બિઝનેસ:કાપડ ઉદ્યોગમાં GSTના ટેક્સ રેટ બદલવા મામલે ફોસ્ટા અને ચેમ્બર વચ્ચે અલગ મત

સીટેક્ષના ઉદ્દઘાટનમાં હાજર રહેલા કાપડ મંત્રી સ્મૃતિ ઈરાની સમક્ષ ચેમ્બર પ્રમુખ દિનેશ નાવડીયા તથા ફોસ્ટાના આગેવાનો દ્વારા એવી રજૂઆત કરાઈ હતી કે યાર્ન સ્તર પર જ 5 ટકા જીએસટી લાગુ કરો ત્યાર બાદ તમામ ઘટકોને બાકાત રાખો. જ્યારે મંગળવારે સીજીએસટીના પ્રિન્સિપલ ચીફ કમિશનર અશોક મહેતા સમક્ષ ચેમ્બરના ઉપપ્રમુખ આશિષ ગુજરાતી દ્વારા એવી માંગણી કરી કે હાલમાં જે ટેક્સ રેટ પ્રવર્તી રહ્યાં છે તેમાં કોઈ ફેરફાર નહીં કરવામાં આવે.

જ્યારે પ્રોસેસર્સ દ્વારા તમામ ઘટકને 5 ટકાના એકસમાન ટેક્સ રેટ પર આવરી લેવાની રજૂઆત અવારનવાર કરવામાં આવી છે. જેથી કાપડ ઉદ્યોગમાં જીએસટીના ટેક્સ રેટ સ્લેબમાં ફેરફાર કરવાના મુદ્દે અંદરોઅંદર એક મત નહીં હોવાનું જણાઈ રહ્યું છે. પરંતુ હજુ સુધી કાપડ પર જીએસટીના મુદ્દે વિવિધ ઘટકોના આગેવાનો એકમત થયા હોય તેવું દેખાતું નથી. શહેરના સાંસદો અને ઉચ્ચસ્તરીય નેતાગીરી સમક્ષ અલગઅલગ રજૂઆતો જતી હોય તેઓ પણ અનેક વખત મંચ પરથી સુરતના કાપડ ઉદ્યોગકારોને ટકોર કરી ચૂક્યા છે કે તમે પહેલાં એકમત થાઓ પછી રજૂઆત કરો.

‘..તો ટેકસટાઇલ સેક્ટરને નુકસાન થવાની સંભાવના’
‘જીએસટીનું ટેક્સ માળખામાં જો ફેરફાર કરાશે તો ટેકસટાઇલ ક્ષેત્રને નુકસાન થવાની સંભાવના હોવાનું ચેમ્બરના ઉપપ્રમુખ આશિષ ગુજરાતી દ્વારા સીજીએસટીના પ્રિન્સીપલ ચીફ કમિશનરને રજૂઆત કરવામાં આવી હતી.