બેદરકારી:કોરોના પોઝિટિવ ગર્ભવતી સિવિલ હોસ્પિટલમાંથી ભાગી, મહિલા ગાયનેક વોર્ડમાં દાખલ થઇ હતી

સિવિલ હોસ્પિટલના ગાયનેક વોર્ડમાં દાખલ પ્રસુતા કોરોનાનો રિપોર્ટ પોઝિટિવ આવ્યા બાદ વોર્ડમાંથી પલાયન થઈ ગઈ છે. વોર્ડમાંથી તબીબોએ પોલીસને જાણ કરતા પોલીસ પ્રસુતાએ લખાવેલા સરનામા પર તપાસ કરવા પણ ગઈ હતી. જોકે ત્યાં પ્રસુતાની કોઈ ભાળ મળી ન હતી. આ બાબતે સિવિલ તંત્ર દ્વારા પાલિકા પોઝિટિવ દર્દીને ટ્રેક કરી કોરન્ટાઈન કરી શકે તે માટે પાલિકાને પણ જાણ કરી છે.

પાંડેસરા લક્ષ્મી નગર ખાતે રહેતી એક 25 વર્ષીય મહિલા 8 સપ્તાહથી ગર્ભવતી છે. બુધવારે મહિલાને દુ:ખાવો થતો હોવાથી સારવાર માટે સિવિલ હોસ્પિટલ આવી હતી. ગાયનેક વોર્ડમાં દાખલ કર્યા બાદ મહિલાનો કોરોનાનો રેપીડ ટેસ્ટ કરતા પોઝિટિવ આવ્યો હતો. જેથી મહિલાને કોવિડ વોર્ડમાં શીફ્ટ કરે તે પહેલા જ નાસી ગઇ હતી. આ બાબતે સિવિલ હોસ્પિટલમાંથી મહિલા પોઝિટિવ હોવાથી તેને પાલિકા ટ્રેક કરી કોરન્ટાઈન કરે તે માટે પાલિકાને પણ જાણ કરી છે.