ખોટું અર્થઘટન:કોર્પોરેટરોએ ગ્રાન્ટ-વિકાસના નામે શું કામ કર્યું, તેની માહિતી પાલિકાની વેબસાઇટ પરથી કાઢી નંખાતા ચૂંટણી પંચમાં ફરિયાદ

ચૂંટણીની જાહેરાત સાથે સુરત મહાનગર પાલિકાની વેબસાઇટ પર કોર્પોરેટરની ગ્રાન્ટ અને બજેટ વિકાસના કામોની માહિતી બંધ કરી દેવામાં આવતા જાગૃત યુવા સમિતિ દ્વારા આચારસંહિતાનું ખોટુ અર્થઘટન કરીને માહિતી બંધ કરી હોવાની ચૂંટણી આયોગમાં ફરિયાદ કરવામાં આ‌વી છે.

ચૂંટણી આયોગ દ્વારા સ્થાનિક સ્વરાજની ચૂંટણીની જાહેરાત કરવાના સાથે સુરત સહિતની મહાનગર પાલિકામાં આચાર સંહિતા લાગુ પડી ગઇ છે. જેના સાથે સુરત મહાનગર પાલિકાની વેબસાઇટ પર કોર્પોરેટરને તેમના કાર્યકાળ દરમિયાન આપવામાં આવેલી ગ્રાન્ટ અને તેમની ગ્રાન્ટનો ઉપયોગ અંગેની માહિતી છુપાવી દેવામાં આવી છે.

તેમજ બજેટમાં થયેલા વિકાસના કામોને પણ ડિપાર્ટમેન્ટ એકાઉન્ટ કોડ ઓફ કન્ડેન્ટ હેઠળ માહિતી છુપાવી દેવામાં આવી છે. આ અંગે જાગૃત યુવા સેવા સમિતિના સંતોષ રાઠોડે આચાર સંહિતાના ખોટા અર્થઘટન કરીને હોવાની ચૂંટણી આયોગમાં ફરિયાદ કરી છે. તેમણે જણાવ્યું હતું કે, પાછળના વર્ષોના બજેટ સંબંધી આંકડા, ખર્ચના આંકડા વેબસાઇટ પરથી હટાવવા અંગે આચાર સંહિતામાં કોઇ નિયમ નથી. જેથી સુરત મહાનગર પાલિકા દ્વારા વેબસાઇટ પરથી હટાવવામાં આવેલી મહિતી ફરીવાર અપલોડ કરવા માટેની માંગણી કરવામાં આવી છે.