કોલ્ડવેવ:આજથી કડકડતી ઠંડી , 10 કિમી ઝડપના પવન ફૂંકાયા, સૌરાષ્ટ્ર-કચ્છમાં કોલ્ડવેવની આગાહી

ઉત્તરના પહાડી વિસ્તારોમાં વેસ્ટર્ન ડિસ્ટર્બન્સ સિસ્ટમ સક્રિય થતાં પહાડી વિસ્તારોમાં હિમવર્ષા સાથે મેદાની વિસ્તારોમાં વરસાદ સાથે વાવાઝોડાની આગાહી છે. રવિવારે મોડીસાંજથી શહેરમાં પવનની ગતિ વધી જતા ઠંડીનું પ્રમાણ વધ્યું હતું. શહેરમાં 10 કિમી પ્રતિકલાકની ઝડપે ઉત્તર દિશાથી ઠંડા પવનો ફૂંકાયા હતા. જેથી આગામી 31 ડિસેમ્બર સુધી ઠંડીનો પારો 4થી 6 ડિગ્રી સુધી ગગડવાની શક્યતા છે.

ભારતીય મૌસમ વિભાગે ગુજરાતમાં સૌરાષ્ટ્ર અને કચ્છમાં કોલ્ડવેવની આગાહી કરી છે. જેની અસર ઉત્તર ગુજરાત સાથે મધ્ય ગુજરાત અને દક્ષિણ ગુજરાતમાં જોવા મળશે. રવિવારે લઘુત્તમ તાપમાનમાં વધુ 1 ડિગ્રીનો વધારો સાથે 19.4 ડિગ્રી નોંધાયું હતું. જ્યારે મહત્તમ તાપમાન 3.6 ડિગ્રીના નોંધપાત્ર ઘટાડા સાથે 28.8 ડિગ્રી નોંધાયું હતું. વાતાવરણમાં સવારે ભેજનું પ્રમાણ 81 ટકા અને સાંજે 41 ટકા રહ્યું હતું.