છેતરપિંડી:સુરતના કોહીનૂર માર્કેટના વેપારી સાથે 30.68 લાખની ઠગાઈ, કોલકત્તાના વેપારીએ કાપડ ખરીદી રૂપિયાની ચૂકવ્યા નહી

સુરતના સલાબતપુરામાં કાપડ વેપારી પાસેથી 30.68 લાખનો કાપડનો માલ ખરીદી કોલકત્તાના વેપારીએ નાણા નહી ચૂકવી ઠગાઈ આચરી હતી. આ મામલે સલાબતપુરા પોલીસ મથકમાં ફરિયાદ નોંધાઈ છે. જેમાં પોલીસે ગુનો નોંધી તપાસ શરૂ કરી છે.

65.48 લાખનો કાપડનો માલ ખરીદ્યો
સુરતના સીટી લાઇટ વિસ્તારમાં રહેતા આયુષ સંતોષભાઇ મખારીયા કોહીનુર માર્કેટમાં કાપડની દુકાન ધરાવે છે. તેઓની પાસેથી વર્ષ 2019માં અલગ અલગ સમયે અલગ અલગ બીલ ચલણથી કોલકત્તામાં રહેતા સ્વસ્તિક ક્રિયેશનના પ્રોપ્રાયટર અશોકકુમાર શ્યામ સુખાએ 65.48 લાખનો કાપડનો માલ ખરીદ્યો હતો. સુરતના વેપારીએ તે માલ ટ્રાન્સપોર્ટ મારફતે મોકલી આપ્યો હતો.

ઉઘરાણી કરતા ધમકીઓ અપાઈ
આ અંગે વેપારીએ નાણાની ઉઘરાણી કરતા કોલકત્તાના વેપારીએ 15 લાખનો ચેક આપ્યો હતો. જે બેંકમાં નાખતા બાઉન્સ થયો હતો. તેમજ અમુક માલ પસંદ ન આવતા 32.16 લાખનો માલ પરત મોકલી દીધો હતો. જયારે બાકીના 30.68 લાખ રૂપિયા ચૂકવ્યા ન હતા. નાણાની ઉઘરાણી કરતા જાનથી મારી નાખવાની ધમકીઓ આપી હતી. જેથી આ સમગ્ર મામલે સુરતના કાપડ વેપારીએ સલાબતપુરા પોલીસ મથકમાં ફરિયાદ નોંધાવી છે. જેમાં પોલીસે ગુનો નોંધી તપાસ શરૂ કરી છે.