ઉઘાડી લૂંટ:ભાટીયા-કામરેજ ટોલનાકા પર રાત્રે 12ના ટકોરે કેશલેન બંધ, હોબાળો શરૂ

ભાટિયા અને કામરેજ ટોલનાકે રાત્રિના 12ના ટકોરે કેશલેન બંધ કરી દેવાતા સ્થાનિકો અને અન્ય વાહનચાલકોએ પણ ઉધમ મચાવ્યો હતો. આ મામલે સરકારે પણ પ્રજા હિતમાં કોઈ રસ્તો ન કાઢતા લોકો વધુ ઉશ્કેરાયા હતા. આ મામલે મંગળવારે પાટીદાર અનામત આંદોલન સમિતિ જિલ્લા કલેક્ટર અને સાંસદોને આવેદનપત્ર આપી રજૂઆત કરશે.

સુરત જિલ્લામાં આવેલા બંને ટોલનાકા ભાટિયા અને કામરેજ ખાતે તમામ ફાસ્ટેગ લેન બંધ કરી દેવામાં આવી છે અને ફક્ત કેશ લેન જ શરુ રાખવામાં આવી છે. સ્થાનિકોએ પણ બહારના વાહનોની જેમ જ ટોલ ચૂકવવાનો વખત આવ્યો છે આ મામલે બનેલી ના-કર સમિતિ નજીકના દિવસોમાં ચક્કાજામ કરવાની ચીમકી ઉચ્ચારી ચુકી છે. હવે પાટીદાર અનામત આંદોલન સમિતિ પણ ટોલલૂંટ મુદ્દે મેદાનમાં આવી ગઈ છે અને જિલ્લા કલેક્ટર તેમજ સાંસદોને આવેદનપત્ર આપશે. ઉલ્લેખનીય છે કે પાસ દ્વારા અગાઉ જ ના-કર સમિતિને સમર્થન આપવામાં આવી ચૂક્યું છે. ફાસ્ટેગના નામે ભાટિયા અને કામરેજ ટોલનાકે શરુ થયેલી ટોલલૂંટ સામે પાટીદાર અનામત આંદોલન સમિતિ મેદાનમાં આવતા હવે આ મુદ્દો સ્થાનિક સ્વરાજ્યની ચૂંટણીમાં પણ ગાજી શકે છે.

ટોલ સંચાલકો અને વાહન ચાલકોમાં બબાલ
રાત્રીના 12ના ટકોરે કામરેજ અને ભાટિયા ટોલનાકા પર પણ કેશલેન બંધ કરી દેવાતા વાહનચાલકો અને કામરેજ ટોલનાકા સંચાલકો વચ્ચે બોલાચાલીના બનાવ પણ સામે આવ્યા હતા. જોકે આવા ઘર્ષણની આશંકાને પારખી ગયેલા ટોલ પ્લાઝાના સંચાલકો લોકોને ફાસ્ટેગ વિશે સમજાવી રવાના કર્યા હતા.