આપઘાતનો પ્રયાસ:એલ એન્ડ ટી ગેસ્ટહાઉસમાં યુવકે પોતાના ગળે ચપ્પુ ફેરવ્યું, મામાને કહ્યું, કોઈ મારી પાસે આવું કરાવે છે

મગદલ્લા એેલ એન્ડ ટી કંપનીના ગેસ્ટ હાઉસમાં યુવકે ચપ્પુ વડે પોતાનું ગળુ કાપી આપઘાતનો પ્રયાસ કર્યો હતો. જેને સિવિલમાં ખસેડાયો હતો. યુવકે તેના મામાને કોઈ તેની પાસે આવું કરાવી રહ્યું હોવાનું કહેતા માનસિક બીમારીના કારણે પગલું ભર્યુ હોવાની શક્યતા વ્યકત કરાઈ છે.

મગદલ્લા ઓએનજીસી કોલોની સામે એલ એન્ડ ટી ગેસ્ટ હાઉસમાં રહેતો દિપક દિવાકર બહેરા(22) ગેસ્ટ હાઉસના કિચનમાં હેલ્પર તરીકે કામ કરતો હતો. રવિવારે રાત્રે 10 વાગ્યે તેણે ગેસ્ટ હાઉસના કિચનમાં ચપ્પુ વડે પોતાનું ગળુ કાપી આપઘાતનો પ્રયાસ કર્યો હતો. જેથી તેના મામા અજીત બહેરા તેને તાત્કાલિક સારવાર માટે સિવિલ લઈ આવ્યા હતા. જ્યાં હાલ તે બેભાન અવસ્થામાં હોવાનું જાણવા મળ્યું છે.

બનાવની જાણ થતા પોલીસ સિવિલ હોસ્પિટલમાં દોડી ગઈ હતી અને તપાસ શરૂ કરી હતી. દિપકના મામા અજીતભાઈએ જણાવ્યું હતું કે, તેની પાસે કોઈ આવું કરાવી રહ્યું હોવાનું દિપકે જણાવ્યું હતું. જેથી માનસિક બિમારીના કારણે તેણે આવું કર્યુ હોવાની શક્યતા વ્યકત કરવામાં આવી રહી છે.