કોર્ટ કાર્યવાહી:​​​​​​​સુરતના તક્ષશિલા અગ્નિકાંડના આરોપી બિલ્ડર સવજી પાઘડાળની જામીન અરજી સામે હાઈકોર્ટમાં એફિડેવિટ રજૂ કરાયું

સરથાણા જકાતનાકા પર આવેલા તક્ષશિલા આર્કેડમાં લાગેલી આગ કેસમાં હાલ બિલ્ડર આરોપીઓ લાજપોર જેલમાં છે. જેમાંથી બિલ્ડર સવજી પાઘડાળ દ્વારા ગુજરાત હાઈકોર્ટમાં જામીન અરજી કરવામાં આવી છે. આ કેસમાં મૂળ ફરિયાદી તરફથી વકીલે એફિડેવિટ કોર્ટમાં રજૂ કરતા વધુ સુનાવણી આગામી 29મી જાન્યુઆરીના રોજ યોજાશે.

અગાઉ જામીન નામંજૂર થયેલા
તક્ષશિલા કેસમાં બિલ્ડર સવજી પાઘડાળ દ્વારા સ્થાનિક કોર્ટથી લઈને હાઈકોર્ટ સુધી જામીન અરજી કરવામાં આવી હતી. જો કે કોર્ટ દ્વારા જામીન અરજી નકારી દીધી હતી. બાદમાં ફરીથી બિલ્ડર સવજી પાઘડાળ દ્વારા જામીન અરજી કરવામાં આવી છે. જેની સુનાવણી આજે હાઈકોર્ટમાં હાથ ધરાઈ હતી.

વકીલે અફિડેવિટ રજૂ કરતાં તારીખ પડી
તક્ષશિલા અગ્નિ કાંડના આરોપી બિલ્ડર સવજીભાઈ ટપુભાઈ પાઘડાળ દ્વારા નામદાર ગુજરાત હાઈકોર્ટમાં જામીન અરજી કરેલ તેમાં મૂળ ફરિયાદીના વકીલ પિયુષ માંગુકિયા દ્વારા એફિડેવિટ રજૂ કરવામાં આવી હતી. જેથી હાઈકોર્ટમાં હવે આરોપીની જામીન અંગેની વધુ સુનાવણી 29 જાન્યુઆરી 2021ના રોજ યોજાશે.