રેકર્ડબ્રેક ડિસેમ્બર:1 દિવસ પછી ઠંડીનું જોર ઘટશે, 2018ને બાદ કરતા, 9 વર્ષે સૌથી વધુ ડિસે.’20માં 12.2 ડિગ્રી ઠંડી; ડિસેમ્બર 2011માં 11.4 ડિગ્રી તો 2018માં 10.6 ડિગ્રી

છેલ્લા 9 વર્ષમાં 2018માં 10.6 ડિગ્રીને બાદ કરતાં વર્ષ 2020માં ડિસેમ્બરમાં સૌથી વધારે ઠંડી નોંધાઇ છે. બુધવારે ઠંડીનો પારો સામાન્ય 0.2 ડિગ્રીના ઘટાડા સાથે 12.2 ડિગ્રી નોંધાયો હતો. સાથે સિઝનની સૌથી વધારે ઠંડી બુધવારે નોંધાઇ છે. આગામી 24 કલાક સુધી કડકડતી ઠંડીનું જોર રહેશે. ત્યારબાદ ક્રમશ: ઠંડીનું જોર ઘટશે. જેના કારણે લઘુત્તમ તાપમાનમાં બેથી ત્રણ ડિગ્રીનો વધારો જોવા મળી શકે છે. ઉત્તર ભારતના પહાડી વિસ્તારોમાં ભારે હિમવર્ષાથી ઉત્તર-પૂર્વ દિશા તરફથી ગુજરાતમાં 8 કિ.મી.ની ઝડપે ફૂંકાઇ રહેલા બર્ફિલા પવનોને લઇ છેલ્લા બે દિવસથી સુરત શહેરમાં કોલ્ડવેવની સ્થિતિ સર્જાઇ છે.

વાતાવરણ ઠંડુંગાર થઇ જતાં બપોરના સમયે ઘરોમાં પંખા ફરતા બંધ થઇ ગયા છે. જ્યારે રાતે ઠંડીથી બચવા માટે ઠેરઠેર તાપણું કરતા લોકોની સંખ્યામાં વધારો જોવા મળ્યો છે. હવામાન વિભાગના જણાવ્યાનુસાર, બુધવારે શહેરનું મહત્તમ તાપમાન 27.4 ડિગ્રી અને લઘુત્તમ તાપમાન 12.2 ડિગ્રી નોંધાયું હતું. જે ગઇકાલની સરખામણીમાં અનુક્રમે મહત્તમ તાપમાન 0.8 ડિગ્રી વધારે જ્યારે લઘુત્તમ તાપમાન 0.2 ડિગ્રી ઓછું છે. વાતાવરણમાં સવારે ભેજનું પ્રમાણ 77 ટકા અને સાંજે 43 ટકા નોંધાયું હતું. ઉત્તર-પૂર્વ દિશાથી 8 કિ.મી.ની ગતિએ પવનો ફૂંકાઇ રહ્યા છે. જાન્યુઆરી માસમાં ઉત્તરાયણ પછી કોલ્ડવેવનો વધુ એક રાઉન્ડ આવે તેવી શક્યતા છે. ત્યાં સુધી હવે ઠંડી સરેરાશ રહેશે.