વિરોધ:કૃષિ બિલના વિરોધમાં સુરતમાં આપનું પ્રદર્શન, કાર્યકરો દ્વારા ભાજપ કાર્યાલયનો ઘેરાવ, 100થી વધુની અટકાયત

સુરતમાં આમ આદમી પાર્ટી દ્વારા આજે દિલ્હીમાં ચાલી રહેલા ખેડૂત આંદોલનના સમર્થનમાં દેખાવો યોજવામાં આવ્યા હતા. ખેડૂત આંદોલનના સમર્થનમાં આજે ભાજપના કાર્યાલયનો ઘેરાવ કરી દેખાવો યોજ્યા હતા. જેમાં શહેરના આપ પાર્ટીના નેતાઓ અને કાર્યકરો મોટી સંખ્યામાં ઉપસ્થિત રહ્યા હતા. પ્લેકાર્ડ અને બેનર સાથે સૂત્રોચ્ચાર કરીને વિરોધ પ્રદર્શન કરવામાં આવ્યું હતું.

જુદા જુદા પોસ્ટર બતાવી તેમજ ઉગ્ર સૂત્રોચ્ચાર કરી વિરોધ
સુરતમાં આપ પાર્ટી દ્વારા પણ કિસાન બિલનો વિરોધ કરવામાં આવી રહ્યો છે. જુદા જુદા પોસ્ટર બતાવી તેમજ ઉગ્ર સૂત્રોચ્ચાર કરી આપ દ્વારા વિરોધ પ્રદર્શન કરવામાં આવ્યું હતું. અને જણાવ્યું હતું કે, અમને ડર છે કે સરકાર કિસાન બિલ લાવી MSP કરતા પણ ઓછા ભાવે ખેડૂતની જે જણસી છે તે વેચવાનું કાવતરું ઘડી રહી છે. ત્યારે વિરોધ પ્રદર્શન કરી રહેલા 100થી વધુની ડિંડોલી, ખટોદરા અને ઉઘના પોલીસ દ્વારા અટકાયત કરવામાં આવી હતી.

સોશિયલ ડિસ્ટન્સ અને માસ્ક ભૂલાયું
કૃષિ કાયદાના વિરોધમાં ખેડૂત આંદોલનને આપ પાર્ટીએ પણ સમર્થન જાહેર કર્યુ અત્રે ઉલ્લેખનીય છે કે, દિલ્હી બોર્ડર પર પંજાબ-હરિયાણાના ખેડૂતો આંદોલન કરી રહ્યા છે. કૃષિ કાયદાના વિરોધમાં શરૂ થયેલાં ખેડૂત આંદોલનને હવે આપ પાર્ટીએ પણ સમર્થન જાહેર કર્યુ છે. એટલું જ નહીં, આજે આપ દ્વારા ભાજપના કાર્યાલયનો ઘેરાવ કરી કૃષિ બિલનો વિરોધ કર્યો હતો. જોકે, આ વિરોધમાં આપ પાર્ટીના નેતા અને કાર્યકર્તાઓ સોશિયલ ડિસ્ટન્સ ભૂલ્યા હતા. જ્યારે કેટલાકે તો માસ્ક પણ પહેર્યા ન હતા.