કામગીરી:59 નગરસેવકોની કુલ 1,68,76,000 રૂપિયાની ગ્રાન્ટ વાપર્યા વગર રહી ગઈ

આગામી 13મી ડિસેમ્બરે સુરત મનપાના નગરસેવકોની 5 વર્ષની ટર્મ પૂર્ણ થનાર છે ત્યારે ટર્મ પૂર્ણ કરનારા 116 કોર્પોરેટરને 5 વર્ષમાં મળેલી વાર્ષિક ગ્રાન્ટમાંથી શું કામગીરી કરી છે? તેનો અભ્યાસ કરતા શહેરના 116માંથી 36 નગરસેવકોની તમામ ગ્રાન્ટ વપરાઇ ગઇ છે અને 59 નગરસેવકોની કુલ 1,68,76,000 રૂપિયાની ગ્રાન્ટ વાપર્યા વગર રહી ગઈ છે. જ્યારે મેયર સહિતના પદાધિકારીઓની વાત કરીએ તો, મેયર ડો.જગદીશ પટેલ પાસે 1.16 લાખ, ડેપ્યુટી મેયર નિરવ શાહ પાસે 6.45 લાખની ગ્રાન્ટ વણવપરાયેલી પડી છે.

જ્યારે સ્થાયી સમિતિ ચેરમેન અનિલ ગોપલાણી અને શાસકપક્ષ નેતા ગિરજાશંકર મિશ્રાની ગ્રાન્ટ પૂર્ણ થઇ ગઇ છે તો વિપક્ષી નેતા પપન તોગડિયા પાસે 3.19 લાખની ગ્રાન્ટ પડી છે. શહેરના 29 વોર્ડમાંથી વોર્ડ નં. 14 કરંજ-મગોબ, વોર્ડ નં. 11માં મુગ્લીસરા-સૈયદપુરા-કુબેરનગર અને વોર્ડ નં. 7 કતારગામ-વેડના ચારે-ચાર નગરસેવકોની ગ્રાન્ટ વપરાઇ ગઇ છે. ગ્રાન્ટના ખર્ચની માહિતી પાલિકાની વેબસાઇટથી બહાર આવી છે. હજુ ટર્મ પૂર્ણ થવાને પાંચ દિવસ બાકી છે ત્યારે નગરસેવકોના ગ્રાન્ટના આંકડામાં ઘટાડો થઇ શકે છે.